ସ୍ୱାଧୀନତା ଆମ ଆସିନି ଆହୁରି
ସ୍ୱାଧୀନତା ଆମ ଆସିନି ଆହୁରି
ପୂରୁବ ଦିଗରୁ ବିଶ୍ଵର ଯିଏ ଥିଲା ଆଲୋକ ବର୍ତ୍ତିକା
ଋଷି ମୁନି ଦେଶ ବେଦ ବାଣୀ ଭାଷ ଦେଇଛି ଏହି ମୃତ୍ତିକା ।
ସ୍ୱାର୍ଥପରତା ଆବୋରିଲା ଯେବେ ସମାଜ ହେଲା ବିଭକ୍ତ
ବିଦେଶୀ ପାଇଲେ ସୁଯୋଗ ପିଇଲେ ପଳପଳ ଏହା ରକ୍ତ ।
ଜୟଚନ୍ଦ୍ରର ସ୍ୱାର୍ଥପରତା ପୃଥ୍ଵୀରାଜେ ହେଲା କାଳ
ଯୁଗଯୁଗ ଧରି ବିଦେଶୀ ଶାସକ ଦେଶ କଲେ ଫାଳ ଫାଳ ।
ଚତୁର ଫିରଂଗୀ ବଣିଜ କରିବା ଆଶେ ଆସିଥିଲେ ଧାଇଁ
ଦେଖିଲେ ଏଠାରେ ଶାସନ କରିବା ଅସୁବିଧା କିଛି ନାହିଁ ।
ହଜାର ବରଷ ବିଦେଶୀ ଶାସନ ପଂଗୁ କଲା ଆମ ଜ୍ଞାନ
କର ଗଣି ଖାଲି ବିଦେଶୀ ମାନଙ୍କୁ ହେଲେ କପର୍ଦକ ଶୁନ ।
'ରାଜ୍ୟ ସତ୍ୱ ଲୋପ' 'ସାନ୍ଧ୍ୟ ଆଇନ' ଲବଣ ମାରିବା ମନା
ତେଜାଇଲା ଧିରେ ଜନ ଆନ୍ଦୋଳନ ଉଡିଲା ଏକତା ବାନା ।
ଦେଶଭକ୍ତିର ଜାଗରଣ ସାଥେ ଡାକରା 'ଭାରତ ଛାଡ'
ଥରିଲା ଇଂରେଜ ଶାସନ ଲବଣ ସତ୍ୟାଗ୍ରହ କୋଡ ମାଡ ।
ଆମ ଭାଗ୍ୟେ ସିନା ଦେଶ ଛାଡି ଗଲେ ଉନେଇଶ ସତଚାଳିଶ
ଭାଇକୁ କରିଲେ ଭଗାରି ବୁଣିଲେ ଦେଶ ବିଭାଜନ ବିଷ ।
ସ୍ୱାଧୀନ ହୋଇଲା ଦେଶ ଆମ ସିନା ସ୍ୱରାଜଟି ମରୀଚିକା
ନେତା ଶୋଷୁଛନ୍ତି ଜନତାଙ୍କୁ ସିଏ ଚାହିଁଛି ହୋଇ ଜଳକା ।
ଏକ ହେଲା ନାହିଁ ଦେଶ ଆମ ଆମେ ବହୁଧା ବିଭକ୍ତ ଆଜି
ନେତା ବାବା ସାଧୁ ଡାକ୍ତର ଶିକ୍ଷକ ସାଜିଛନ୍ତି ସବୁ ପାଜି ।
ସ୍ୱରାଜ ପାଇଁ କି ନୂଆ ସ୍ୱାଧୀନତା ଆନ୍ଦୋଳନ ଲୋଡା ପଡେ
ଜନତା ସଭିଏଁ ନେତା ହେବେ ଯଦି ପାଜିଙ୍କୁ କିଏବା ଲୋଡେ !!