ବଡ ଠାକୁର
ବଡ ଠାକୁର
ନୀଳାଚଳେ ଲୀଳା କରୁଛ କାଳିଆ
ଓଡିଆ ବଡ ଠାକୁର
ବଡଦେଉଳର ସ୍ଵର୍ଗ ଶୀରି କିବା
ବର୍ଣ୍ଣିବା ମାନବ ଛାର ।
ଦାଣ୍ଡ ଯହିଁ ଦାଣ୍ଡ ନୁହେଁ ବଡଦାଣ୍ଡ
ତା ଧୁଳି ମୁଣ୍ଡେ ମାରିଲେ
ସାଗର ଯାହାର ମହୋଦଧି ଯହିଁ
ସ୍ନାନ କଲେ ପୁଣ୍ୟ ମିଳେ ।
ମସାଣି ଯେଉଁଠି ସରଗକୁ ସିଡି
ନାମ ତା'ର ସ୍ୱର୍ଗଦ୍ୱାର
ଇଛନ୍ତି ସକଳ ଦାହ ପାଇଁ କାଳେ
ପାଇବେ ବୈକୁଣ୍ଠପୁର ।
ରୋଷ ଘରେ ଯେଉଁ ଅଗ୍ନି ପାକ କରେ
ବୈଷ୍ଣବାଗ୍ନି ତା'ର ନାମ
ସ୍ୱୟଂ ମହାଲକ୍ଷ୍ମୀ ସୁବର୍ଣ୍ଣ ଚଟୁରେ
ପାକ କରନ୍ତି ସୁଗମ ।
ସବୁ ମନ୍ଦିରରେ ପ୍ରସାଦ ମିଳଇ
ପୁରୀରେ ମହାପ୍ରସାଦ
କୈବଲ୍ୟ ନିର୍ମାଲ୍ୟ ଜୀବ ଯିବାବେଳେ
ପ୍ରାଣୀ କରଇ ଆସ୍ୱାଦ ।
ବେଶ ତୁମ ବଡ ସିଂହାର ପ୍ରସାଦ
ଲାଗି ହେବା ଆଗୁ ଲୋଡା
ସବୁଠି ପ୍ରସାଦ ବାଢିକି ବାଣ୍ଟନ୍ତି
ତୁମ ପ୍ରସାଦ ଅବଢା ।
ସବୁ ମନ୍ଦିରରେ ପଣ୍ଡା ପୂଜା କରି
ଜଗା ପାଖେ ବଡପଣ୍ଡା
ଭକତ କରଇ ଅଳି ପାଇବାକୁ
ତାଙ୍କ ହାତୁ ଟିକେ ଧଣ୍ଡା ।
ସ୍ଵୟଂ ଜଗନ୍ନାଥ ମହାବିଷ୍ଣୁ ରୂପେ
ମର୍ତ୍ତ୍ୟ ବୈକୁଣ୍ଠେ ଅର୍ଚ୍ଚିତ
ଦେବ ଯକ୍ଷ ଋକ୍ଷ ଗାନ୍ଧର୍ବ କିନ୍ନର
ହୋନ୍ତି ଯହିଁ ଆତଯାତ ।
ପ୍ରତିଷ୍ଠାତା ତୁମ ସ୍ୱୟଂ ଗଜପତି
ତୁମ ଚଳନ୍ତି ପ୍ରତିମା
ରାଜା କାହିଁ ଛେରା ପହଁରା କରନ୍ତି
ବିଶ୍ଵରେ ନାହିଁ ଉପମା ।
ଶ୍ରୀଗୁଣ୍ଡିଚା ରାଣୀ ଶ୍ରୀମନ୍ଦିର କଲେ
ବଂଶେ ନରହିଲେ କେହୁ
ତବ ଇଚ୍ଛା ପୂର୍ଣ୍ଣ ହେଉ ମହାବାହୁ
ଜଗତ ଉଦ୍ଧାର ହେଉ ।