ପ୍ରୀତିଭାବ
ପ୍ରୀତିଭାବ
ପ୍ରୀତିଭାବ
ପୁରାଣଠୁଁ ପୁରୁଣା
ଗୋପନଗାଥାର ସମୀକରଣ
ସଂସ୍କୃତିର ନିର୍ଯ୍ୟାସ ଆଉ
ଜନ୍ମାନ୍ତର ସମ୍ବନ୍ଧର
ଐଶ୍ବରୀୟ ଅନ୍ତଃସ୍ବର ମୋ
ପ୍ରାଣଠୁଁ ମହାପ୍ରୟାଣ ଯାଏଁ ବିସ୍ତୃତ
ପ୍ରେମ ପାରାବାରର ବେଳାଭୂମି ।
ସହସ୍ର ଥର ଡେଇଁପଡେ
ଆକଟ ଲକ୍ଷ୍ମଣରେଖା ଯେତେ
ପରିବ୍ୟାପ୍ତ ହୁଏ ଉଲ୍ଲୋଳିତ ତନୁ
ପାତାଳରୁ ସର୍ବୋଚ୍ଚ ଶୃଙ୍ଗ ଯାଏଁ ଭେଦି
ତୁମ ଅଙ୍ଗ ସ୍ପର୍ଶ ପାଇଁ ପ୍ରିୟେ
ପ୍ରତ୍ୟେକ ବେଳରେ
ଅଣନିବେଦିତା ହୋଇ ।
ନୀରବତାର ଶବ୍ଦରେ ଖୋଜି ନଥିଲି
ପ୍ରତିଶ୍ରୁତିର ସଂଜୀବନୀ କି
ବିଶ୍ବସନୀୟତାର ସ୍ବର୍ଗବାସ ।
ଆକଣ୍ଠ ଗରଳରେ ନୀଳକଣ୍ଠ ସାଜି
ପ୍ରେମର ନିର୍ମାଲ୍ୟକୁ ପେଢିରେ ସାଇତି
ସଂଜ୍ଞା ନିରୂପଣ କରେ ପ୍ରତିଥର
ଅପ୍ରମିତ ଉପପାଦ୍ୟ ସବୁର ।
ମହାପାତକର ଶଙ୍କାହୀନ ହୋଇ
ଶ୍ରୀରାଧା ସ୍ବତଃ ବଢାଇଦେଲେ
ପାଦଧୁଳି ଉଦ୍ଧବଙ୍କ ହସ୍ତେ
ଶ୍ରୀକୃଷ୍ଣଙ୍କ ଲାଗି ପ୍ରେମର ଉତ୍କର୍ଷେ,
ସେ ଭାବ ନ ଥିଲା କି ମୋର ??
କବି- ଶ୍ରୀଯୁକ୍ତ ପ୍ରସନ୍ନ କୁମାର ମାଦଳା