ରଦି କାଗଜ
ରଦି କାଗଜ
ଭାବନାକୁ ମୋର ମନ ଦେଇ କେବେ
ଭଲରେ ପାରିନ ପଢି
ରଦି କାଗଜ ମୁଁ ଚିନାବାଦାମର
ଠୁଙ୍ଗାଟେ ଦେଇଛ ଗଢି ।
ପୂଜା ଗହଳିରେ ଡାକବାଜି ଗୀତ
ଶୁଣି ନଶୁଣିବା ପରି
ମୋ' କୁହାକଥାକୁ ମନ ଦେଇ କେବେ
କାନରେ ପାରିନ ଭରି ।
ଆଲାର୍ମ ବାଜିଲେ ନିଦ ବାଉଳାରେ
ଦେଖିଲା ଭଳିଆ ଘଡି
ଆଡଆଖି କରି ଚେହେରା ନଦେଖି
ଆଗକୁ ଯାଇଛ ବଢି ।
ସୁଖଦୁଃଖ କଥା ଦୂର ସମ୍ପର୍କୀୟ
ନଦେଖି ଯେମିତି ଭୋଗେ
ନିର୍ଜୀବ ସମାନ ଭୋଗିଛ ବି ମୋତେ
କରମ ନିଊନ ଯୋଗେ ।
ଚାକିରି ଆଗରୁ ପଢିଛ ଯେମିତି
ରୋଜଗାର ବିଜ୍ଞାପନ
ଭାବିଥିଲି ମୋତେ ଭଲକି ନିରେଖି
ପଢିନେବ ତନ୍ନ ତନ୍ନ ।
ଭାବିଥିଲି କେହି ଶୁଣିବେ କି ମୋତେ
ଯେହ୍ନେ ଅନାହତ ଧ୍ବନି
ନୂଆ ଭାଷା ପ୍ରାୟେ ବୁଝିବେ ଭଲରେ
ଭାବରେ କରାଇ ଧନୀ ।
ନିଆଁ ଲାଗିଥିଲେ ସାହିରେ ଯେଭଳି
ସଭିଏଁ ରଖନ୍ତି ଆଖି
ଆଶା ଥିଲା ମୋତେ ଦେଖିବ ସେମିତି
ରହିଥାଇ ପାଖାପାଖି ।
ମାଘୁଆ ଶୀତରେ କମ୍ବଳ ଭଳିଆ
ଭୋଗିନାହଁ ଦିନେ ଯେବେ
ଅଲୋଡ଼ା ଅଖୋଜା ଜଙ୍ଗଲୀ ଲତା ମୁଁ
କି ଲାଭ ପାଇବି ତେବେ !
ଚରିତ୍ର ସମ୍ଭାଳି ନିନ୍ଦିବା ସୁଯୋଗ
ଏଯାଏଁ ତ ଦେଇନାହିଁ
ପରମପୁଂସ ହେ ଅନୁଗ୍ରହ ବଳେ
କରିବ କି ଏଥୁ ତ୍ରାହି ?