ଉତ୍କଳେ ଉତ୍ସବ
ଉତ୍କଳେ ଉତ୍ସବ
ପ୍ରଚଣ୍ଡ ବୀରତ୍ଵ କାଳଜୟୀ କଳା ଉତ୍କଳର ପରଂପରା
ଗଂଗା ଠାରୁ ଗୋଦାବରୀ ଜୟକରି କଳା କୋଣାରକେ ଭରା ।
ଗାନ୍ଧିଜୀଙ୍କ ବାଣୀ ଭାରତର ଆତ୍ମା ରହିଛି ଆମ ଗ୍ରାମରେ
ସରଳ ଜୀବନେ ଉଚ୍ଚ ପରଂପରା ଭରି ରହିଛି ସେଠାରେ ।
ଉଡ୍ର କୃଷକର ରାଇଜ ଓଡିଶା କଳିଙ୍ଗ ଉତ୍କଳ ନାମ
ପୁରୁଷୋତ୍ତମରେ ଶ୍ରୀମଦ ଶଙ୍କରାଚାର୍ଯ୍ୟ ଗୋବର୍ଦ୍ଧନ ଧାମ ।
ବିବାହ ଉତ୍ସବ ବନ୍ଧୁ ମିଳନରେ ବାର ମାସେ ତେର ପର୍ବ
ସ୍ୱୟଂ ଜଗନ୍ନାଥ ଯହିଁ ବିରାଜିତ ଦେବତା ଆସନ୍ତି ସର୍ବ !
ଭାଗବତ ଟୁଂଗି ପାଲାର ଗାୟଣୀ ଦାସ୍ କାଠିଆ ଘୋଡାନାଚ
ବେଦୋପନିଷଦ ଛାନ୍ଦ ଚଉପଦୀ ଲୋକକଳା ପ୍ରଚଳିତ।
ଗଣପର୍ବ ନୂଆଖାଇ ଭେଟଘାଟ କୃଷିଭିତ୍ତିକ ସମାଜ
ଫସଲ ଉତ୍ପାଦ ସମର୍ପିବା ପାଇଁ ଘରଦ୍ବାର ସଜବାଜ ।
ଅଦ୍ଭୁତ ଏ ରୀତି ଧରଣୀ ହୁଅଇ ରଜଶ୍ୱଳା ରଜ ପର୍ବ
ଭୂମି କରଷଣ ମନା ତିନି ଦିନ ନାରୀର ମହତ୍ୱ ସର୍ବ ।
ମାଣବସା ଗୁରୁବାର ଚାରିପାଳି ତଅପୋଇ ବୁଧେଇ ଓଷା
ବିବାହ ବ୍ରତରେ ଗ୍ରାମ ଦେବତୀଙ୍କ ମାଜଣା ଦିଏ ଭରଷା।
ଗହ୍ମା ଦଶହରା ହୋଲି ପଂଚକ ଦୀପାବଳି ପଂଚୁଦୋଳ
ପୂର୍ଣ୍ଣମୀ ଅମାବାସ୍ୟା ସଂକ୍ରାନ୍ତି ପର୍ବ ଏଠି ମାଳମାଳ ।
ଛୁଂଚିପତ୍ର ପିଠା ପୋଡପିଠା ମଣ୍ଡାପିଠା ଆରିଷା କାକରା
ଚକୁଳି ଚିତଉ ପିଠା ମିଠା କେତେ ପରବର ମୁଖ୍ୟ ଧାରା ।
ଶାମ୍ବ ଦଶମୀର ଡାଲମା ସାଥିରେ ଦଉଡା ଦଉଡି ଜାଉ
ଧାନବିଲେ ନିଜ ଜନ୍ତାଳ କୀର୍ତ୍ତନ ଅଷ୍ଟପ୍ରହରୀ ଟି ଥାଉ ।
ସାବିତ୍ରୀ ଓଷାର କଷା ମିଠା ଫଳ ବିଷୁବ ସଂକ୍ରାନ୍ତି ପଣା
ଛତୁଆ ସାଂଗରେ ଚଉଁରାରେ ଠେକି ବୁନ୍ଦା ଜଳସେଚ ଗଣା ।
ବାଗୁଡି ପୁଂଚିର ଜମକ ଚମକେ ଲୁଡୁଖେଳ କୁଆଁରୀର
ସଂସ୍କୃତି ଧୀରେ ମରି ଯାଉଅଛି ଉଦ୍ଧାର ଉଦ୍ଧାର ଉଦ୍ଧାର ।
ଚଣ୍ଡାଶୋକକୁ ଧରମାଶୋକରେ ପରିଣତ ଯିଏ କଲା
ଆପଣା ସଂସ୍କୃତି ଫେରାଇ ଆଣିବା କେଉଁ ବିଚିତ୍ର ବା ଭଲା !!