ସମ୍ବଲପୁରୀ ନନୀ
ସମ୍ବଲପୁରୀ ନନୀ
ଏ ବେଟୀ....ଦମ ଧର..
ମାଁର୍ ପନତକାନି ନ ଥିମି ବଲି
ଏଁନ୍ତା ଫୁଲେଇ ହେଲେ କେଂତା ହେବା?
ତୋର ଅଂଟାହଲା ସମକୁ ବାଇ କରସି ଯେ ;
ଗାଁର୍ ପିଂଢାନ ଚପକି ଗଲେ ନାଇଁ ବନେ
ଗାଁ ତରାର୍ ଜୋର ଲହଁକି
ତତେ ରାଇଜ ଜିତବାର କେ ହେବା ।
ଫିରୋଜ୍
ଦଗଦଗଉଥିସି ତୋର ସମ୍ବଲପୁରୀ ଶାଢ଼ୀ
ଖିରପିନି ପଏଁରୀ ଟାଡ଼ ବାହାଁସୂତା
ସବୁ ଚମକୁ ଥିବା..
ତୋର ଗୁଡର୍ ଲାଲ ଜରଜର ଅଳତା
ଗୁଭାନ ମଲିଫୁଲର୍ ଗଜରା
ବନେ ସୁନ୍ଦର ଦିସସି ..ମାନୁଛେଁ;
ହେଲେ ବେଲ କାଲ କେ ଦେଖି
ତତେ ଗାଲେ ଟିକେ ପାଉଡର
ଓଠେ ଳିବିସ୍ଟିକ୍ ,ଆଁଖି କାଜଲ
ସବୁ ଲଗେଇ କେ ହେବା
ନାଇଁତ ଏଭର ଧଙ୍ଗରା
ତତେ ଫଟ୍ କରି ବାଉନି ଦେବା ।
ଢୋଲ ପାହାରେ ଢୁଲିଆ ତତେ ହେନ୍ତା ନଚାବା
ତାସା ନିଶାନର୍ ତାଳେ ମଚାନ୍ ଗର୍ଯିବା
ହେଲେ ମୁହୁରିଆର୍ ମୁହୁରି ସୁରେ
ତୋର ତୁଣର୍ ଡାଳଖାଇ
ଖାଲି ଆଦି କାଲର୍ କଥା କହେଲେ
ଏଭର ଦେଖନହାରୀକେ ଅଡୁଆ ନାଇ ହେବା ?
ବେଟୀ ଗୋ ..
ତତେ ଏଭର କଥା ବି କହିକେ ହେବା ।
#firoj
ଶୁନଶାନ୍ ଝାରେ ତୁଇ
ଗର୍ବର୍ ଚଉସିଙ୍ଘା ହିରନ୍ ହ କି
ମହକନର୍ କସ୍ତୁରୀ ମୃଗ
ହେଲେ,ଲା ଲା କରୁଥିବାର
ଆଧୁନିକତାର୍ ବାଘର୍ ଗର୍ଜନ ବି
ତତେ ବାରିକେ ହେବା
ନାଇଁ ତ, ଛନେ ଗଲେ
ନା ତୁଇ ଥିବୁ ନା ତୋର ନାଁ
ଯିବା ଯିବା..ସବୁ ମେଟି ଯିବା ।
ଏ ବେଟୀ ...ବୁଝିଯା
ଅଂଟା ଭିଡ଼..ଆଗକେ ବଢ
ସୃଷ୍ଟି ଆରୁ ଶୃଙ୍ଗାର୍ ସାଙ୍ଗେ କର
ତେହେରୁ ଦେଖବୁ
ଯୁଗ ଆଏବା ଯୁଗ ଯିବା
ହେଲେ ଖାସ ତୋର ଲାଗି
ଫି-ରୋଜ ମଚାନ୍ ଗରଜୁଥିବା ।
ଫିରୋଜ କୁମାର ପଟେଲ
ଅଵନକେଲା,ସୁନ୍ଦରଗଡ଼-୧୯