ମୋପରେ ପ୍ରସନ୍ନ ହୁଅ

ଚମ୍ପା,କନିଅର,ଅରଖ,ଦୁଦୁରା

ସବୁ ତ ଅରପିଲିଣି ,

ଆଉ କେଉଁଥିରେ ତୋଷହେବ ତୁମେ

କୁହ ଆହେ ଶୂଳପାଣି !!

ଗିରିରାଜଙ୍କର ଅଟେ ମୁଁ ଦୁଲାଳୀ

ହୈମବତୀ ମୋର ନାଆଁ ,

ତୁମପାଦେ ମନ ଅରପି ଦେଇଛି

ନ ଜାଣି ବି ଗୋତ୍ର-ଗାଆଁ ।

ଲୋଡ଼ାନାହିଁ ମୋର ରାଜସୁଖ ଶିରୀ

ଅବା କେଉଁ ସୁପୁରୁଷ ,

ଜଗତ ଯାକର ସକଳ ଐଶ୍ୱର୍ଯ୍ୟ 

ତୁମ୍ଭଠୁଁ ଆରମ୍ଭ ଶେଷ ।

ଯୋଗୀଙ୍କ ମଧ୍ୟରେ ମହାଯୋଗୀ ତୁମେ

ସକଳ ଇନ୍ଦ୍ରିୟ ଜୟୀ ,

ଆଶୁତୋଷ ଆଉ ବରାଭୟ ଦାତା

ଅଛି ତୁମପଦ ଧ୍ୟାୟୀ ।

ବରିବାକୁ ଚାହେଁ ପ୍ରାଣପତି ରୂପେ

ମୋପରେ ପ୍ରସନ୍ନ ହୁଅ ,

ମୁଦ୍ରିତ ନୟନ ଖୋଲି ହେ ମହେଶ

ସନମତି ବାରେ ଦିଅ ।