ଅଭାବ ହେବନି କାଳ
ଅଭାବ ହେବନି କାଳ
ନଗେନ୍ଦ୍ର ନାଥ ପଟ୍ଟନାୟକ
ଏକ ପରେ ଏକ ଆଗପଛ ହୋଇ
ଚାଲନ୍ତି ପିମ୍ପୁଡ଼ି ଦଳ ,
ସତେ କି ଯେମିତି ଗଢ଼ିଛନ୍ତି ରେଳ
ହୋଇ ମିଳିମିଶି ଠୁଳ । ।
ଦିନ ସାରା ଚାଲି ହାଲିଆ ହୁଏନି
କେତେ କଷ୍ଟ କରେ ସିଏ ,
ବହୁ ପରିଶ୍ରମେ ସଞ୍ଚଇ ଆହାର
ସେ ପରା ପିମ୍ପୁଡ଼ିଟିଏ । ।
ଛୋଟ ସିନା ଦିଶେ ଆକାରରେ ସିଏ
କାମଟି ତା’ର ବଡ଼ ,
ଚାଉଳ ଚିନିକୁ ବୋହିନିଏ ବେଗେ
ହୁଏନି ସେ ହଡ଼ବଡ଼ । ।
ସାଇତି ରଖଇ ଆହାର ଯତନେ
ବିପଦ ଆପଦ ବେଳେ ,
ଖାତିର କରେନି ଖରା ବରଷାକୁ
ଖଟଇ ଶକତି ବଳେ । ।
ଆସରେ ପିଲାଏ ଶିଖିବା ତା’ଠୁଁ
ଏକତାର ବଡ଼ ବଳ ,
ତା’ ସଞ୍ଚୟ ଗୁଣ ଆଦରିଲେ ଆମେ
ଅଭାବ ହେବନି କାଳ । ।