ଗୀତ ଫୁଗୁଣର

ମୁଠାମୁଠା ରଙ୍ଗ ବିଞ୍ଚିଦେଇଗଲା

ଫୁଗୁଣ ଧରାକୁ ଆସି

ଲୁଚିଲୁଚି ଏବେ ପତର ଉହାଡେ

କୋଇଲି ଗଲାଣି ବସି

ଗୀତ ଗାଏ କୁହୁକୁହୁ

ଏମିତି ମଧୁର ତା’ କଣ୍ଠର ସ୍ୱର

ସତେ ମିଠାମିଠା ମହୁ ।

ଦୋଳ ଯାତରାରେ ବିମାନରେ ବସି

ଠାକୁର ଯାଆନ୍ତି ବୁଲି

ରଙ୍ଗର ପସରା ବାଣ୍ଟିବାଣ୍ଟି ଏବେ

ଆସି ବି ଗଲାଣି ହୋଲି

ସଭିଏଁ ହୁଅନ୍ତି ଖୁସି

ଇନ୍ଦ୍ରଧନୁ ସତେ ସବୁ ରଙ୍ଗ ଧରି

ଆକାଶୁ ପଡୁଛି ଖସି ।

ଯୁଇ ଜାଇ ହେନା ତମାଳ କେତକୀ

ହସନ୍ତି ପାଖୁଡା ମେଲି

ମଳୟ ପରଶେ ବଉଳର ପେନ୍ଥା

ଆନନ୍ଦରେ ଯାଏ ଝୁଲି

ଦିଶଇ ସୁନ୍ଦର ଶୋଭା

ଧରାକୁ ଏମିତି ଆସିଲେ ଫଗୁଣ

ହୋଇଯାଏ ମନଲୋଭା ।