ଶୂନ୍ୟହସ୍ତ
ଶୂନ୍ୟହସ୍ତ
ଶୂନ୍ୟହସ୍ତ
ଲଲାଟେନ୍ଦୁ କବି
ଆସିଥିଲି ବୋଲି ଶୂନ୍ୟ ହାତେ ଗୋ ରିକ୍ତ ଯିବି କି ଫେରି ?
ମୋ ଭିଜା ନେତ୍ରେ କମ୍ପ୍ର ଅଧରେ ରୁଦ୍ଧ ବେଦନା ଭରି ?? -୧
ମୋ ସାଥେ ଥିବ ମୋ ଅକୁହା ଗଳ୍ପ ରସନା ସ୍ଵଳ୍ପ ଖୋଲି;
ତୁମ କାନେ କାନେ କହିବ ବିଜନେ ଭୁଲନା ଭୁଲନା ବୋଲି | -୨
ବିକ୍ରମ ଭରେ ଯତ୍ନେ ସାଥିରେ ନେବି ମୋ ଫେରିବା ପଥେ
ତୁମରି ପ୍ରୀତିର ଉଚ୍ଛଳ ଝର ସହଚର କରି ସାଥେ || -୩
ଯେତେ ଭର୍ତ୍ସନ କରି ମାର୍ଜନ ଯତ୍ନେ କରି ଗୋ ସାଥୀ
ବର୍ଷା ଶିଶିରେ ଗ୍ରୀଷ୍ମ-ଲହରେ ଉମ୍ର ମୋ ଯିବ ବିତି || -୪
ତୁମରି ନେତ୍ରେ ଦେଖି ମୁଁ ଅଶ୍ରୁ ଅଳ୍ପ ଲେଖୁଛି କଥା;
ବାକି ରହିଗଲେ ଆସି ଶିବ-ସ୍ଥଳେ ଶୁଣିଯିବ ଗୋ କବିତା || -୫
ତୁମେ ନ ଆସିଲେ ତୁମ ପାଶେ ନିଜେ ଶୁଣାଇବି ଦିନେ ଦିନେ;
ଯିଏ ଯେତେ ମୋତେ ଦେଇଛ ଶରଧା ସେତେ ସେତେ ତାହା କାନେ ||-୬
ଡରିବ କି ସାଥୀ ଏ କାହୁଁ ଆସିଲା ଭୂତଟେ ଭୂତଟେ ବୋଲି ?
ଏତେ ଭଲ ତେବେ ପାଅନା କେ ମୋତେ ଏବେଠାରୁ କହିଦେଲି || -୭
*****