ମୋ ଜହ୍ନ
ମୋ ଜହ୍ନ
ଦିନ ତ ଦିନ,
ରାତିସାରା କାଲି
ଲାଗି ରହିଥିଲା ଲଘୁଚାପ ବର୍ଷା...
ଅହରହ ବର୍ଷାରେ ତଥାପି
ଜଳି ଚାଲିଥିଲା
ସୁପ୍ତ-ଈପ୍ସିତ ମୋ ଗହମୀ ଈର୍ଷା,
ଅନେକଥର ଦେଖିଛି ତୁମ ଆଖିରେ
ଏକ ଅଦ୍ଭୁତ କିସମର ଜ୍ଵଳନ...
ହେଲେ କିଏ ଜାଣିଥିଲା
ଅମେଇସା ରାତିରେ ଜାଳିବନି ତମେ ଦୀପ
ସେଇ ଜ୍ଵଳନରେ ଜାଳିଦେବ
ମୋ ଭିତରର ସବୁ ମୁଁ’ର ଆସ୍ଫାଳନ !
କାଲି ମୋ ଅନିଦ୍ରା ରାତିରେ
ସଞ୍ଚରି ସାରିଥିଲା ସରି ନଥିବା ତୁମ ଆଖିର ସ୍ଵପ୍ନ
କେବଳ ଗୋଟିଏ ମାୟା ଥିଲ
ନା ତମେ ହିଁ ସେଇ, ମୋ କୁଆଁର ପୁନେଇ ଜହ୍ନ !