ସାର୍ଥକ ମିତ୍ର
ସାର୍ଥକ ମିତ୍ର
ବାଡି ଖଣ୍ଡେ ବୋଲି ଗବ ବାଡି ଖଣ୍ଡେ ହାତୁ ନଛାଡିବ କ୍ଷଣେ
ଶତୃକୁ ଆଣ୍ଟେ ପାଣିକୁ କଣ୍ଟେ ସଂଗେ ହୋଇଥିବ ଜଣେ ।
ବାଡି ଖଣ୍ଡେ ଯଦି ଏତେ ବଡ ସାଥୀ- ସାଥୀ କଥା କି କହିବା
ସାଥୀ ହୀନ ଜନ ପଶୁଠାରୁ ହୀନ ଶିରରେ କର ମାରିବା ।
ଭଲକୁ ପ୍ରଶଂସା ସମାଜ କରିବ ଭୁଲ କଲେ ନିନ୍ଦା ଦେବ
ସାଥୀଟିଏ କିନ୍ତୁ ଦେହାତୀତ ଯାଏ ଗୁଣଗାନ କରୁଥିବ ।
ଦରିଦ୍ର ସୁଦାମା ଖୁଦଭଜା ଧରି ଦ୍ୱାରକାରେ ପହଂଚିଲେ
ପାଦଧୌତ କରି ସିଂହାସନେ ରାଇ କୃଷ୍ନ ଅରଚନା କଲେ ।
ଛଡାଇ ଖାଇଲେ ଖୁଦଭଜା ଅଷ୍ଟ ପାଟବଂଶୀ ଆଚମ୍ବିତ
ବଂଧୁତ୍ୱ ବୁଝେନା ଧନ ମାନ ଭେଦ କଂଧେ ଥାଉ ଉପବୀତ ।
ବିପଦର ବଂଧୁ ବାସ୍ତବରେ ବଂଧୁ ପିତା ମାତା ସହୋଦର
ଛାୟା ପରି କାୟା ଦିଏ ଅର୍ଦ୍ଧାଂଗିନୀ ସାଥୀ ଜନ୍ମ ଜନ୍ମାନ୍ତର ।
ରବିଙ୍କ ଦକ୍ଷିଣାୟନେ କମଳିନୀ ଝାସଦେଇ ହୁଏ ସତୀ
କେତେଦୂରେ ଚନ୍ଦ୍ର କାହିଁ କୁମୁଦିନୀ ଅଭେଦ୍ଯ ତାଙ୍କର ପ୍ରୀତି ।
କର୍ଣ୍ଣ ମହାବୀର ଦୁର୍ଯ୍ୟୋଧନ ସଖା ଲାଗି ଅନ୍ୟାୟର ସାଥେ
ମରଣକୁ ପଛେ ବରଣ କରିଲେ ଛାଡିଲେନି ଅଧା ପଥେ ।
ସାଥୀ ବିନା ନାହିଁ ଜୀବନର ମୂଲ୍ୟ ସାଥୀକୁ ଭୁଲିବା ନାହିଁ
ମିତ୍ରଦ୍ରୋହୀ ଗତି ନରକକୁ ହୁଏ- ଗୀତଟିଏ ମିତ ପାଇଁ ।
-ବିଶ୍ୱେଶ୍ୱର ମାଝୀ-
9437697161
majhibisweswar@gmail.com