ଲିଚି ! ଗୋଟିଏ ପ୍ରେମର ନାଁ

ଆସ ଆଜି ସତ କରିଦେବା

ଲୋକଂକ ସନ୍ଦେହକୁ !

ଆଜି ପାଇଁ ବନ୍ଦ ରଖିବା ଯୁଦ୍ଧ

ତୁମେ ପାଦ ଚିପି ଚିପି

ଘେରାଏ ବୁଲି ଆସ ମୋ ଓଠ ତଳ କଳାଜାଇରେ

ଯୋଉଠି ଦିନେ ପୋତିଥିଲ

ଅନ୍ଧାର ଓ ମୃଗତୃଷ୍ଣା ଏକାଠି

ମୁଁ ମୋ ଆଖି ଡୋଳାକୁ

ମୁକ୍ତ କରୁଛି ଆଲୁଅର ଲାଜ ଲାଜ ରଂଗରୁ

ଅସଂଖ୍ୟ ସଂଦେହୀ ପାଦ ଶବ୍ଦରେ

ତିଆରି ହେଇ ସାରିଲାଣି

ପୃଥିବୀର ମୁଖା...

ଏବେ

ଗୋଟିଏ ପ୍ରାର୍ଥନା ଉପରେ

ଆମେ ଥାପି ଦେବା ଆମ ଦେହ

ଲିଚି ପାଦର ହଳେ ପାଉଁଜି ପାଇଁ

ଆସ ଆଜି ଥରକ ପାଇଁ ହେଲେବି

ଲକ୍ଷେ ଚାହାଣିର ସାମିଆନା ତଳେ

ଟିକେ ଅବାଧ୍ୟ ହେବା

ଆସ ଆମେ ମୁକ୍ତ ହେବା !!