ଜଗନ୍ନାଥ ହେ ତୁମେ ତୁମକୁ ସାହା
ଜଗନ୍ନାଥ ହେ ତୁମେ ତୁମକୁ ସାହା
ଜଗତର ନାଥ ତୁମେ
ବଡ ଠାକୁର ।
ଠିକଣା ତୁମର
ବଡ ଦେଉଳ
ନାଁ ଯାହାର ଶ୍ରୀମନ୍ଦିର ।
ନିଳଚକ୍ରରେ ଉଡେ
ତୁମ ବାନା ପତିତପାବନ
ହୋଇ ଫରଫର ।
ତୁମ ଦାଣ୍ଡ ତ ବଡଦାଣ୍ଡ,
ତୁମ ବାଇଶି ପାହାଚ
ସାମ୍ନାରେ ଗରୁଡ଼ ସ୍ତମ୍ଭ ।
ତୁମ ଚକାଚକା ଆଖିରେ
ସବୁ ଦେଖୁଛ,
ମହାପ୍ରସାଦ ଖାଇ
ସବୁ ଜାଣୁଛ ।
ପୂର୍ବରୁ ତ ସବୁ
ଠିକ୍ ଠାକ୍ ଥିଲା
ଯେହେତୁ ସେବାୟତଙ୍କର
ରାଜାଙ୍କ ପ୍ରତି
ପ୍ରାଣର ଭୟ ଥିଲା ।
ତୁମ ମନ୍ଦିରର
ପରିଚାଳନା ଭାର
ଯେବେଠୁ ସରକାରଙ୍କ
ହାତକୁ ଗଲା
ସେବେଠୁ ସବୁ
ବିଶୃଙ୍ଖଳା ସୃଷ୍ଟି ହେଲା ।
ସେବାୟତଙ୍କ ଦୌରାତ୍ମ୍ୟରୁ
ତୁମ ଘଟ ପରିବର୍ତ୍ତନ
ନିଶାର୍ଦ୍ଧରେ ନହୋଇ
ସ୍ପଷ୍ଟ ଦିବାଲୋକରେ ହେଲା ।
ବାରମ୍ୱାର ତୁମ
ନୀତି କ୍ରାନ୍ତିରେ କରି ବିଭ୍ରାଟ
ସାରା ଦିନ ତୁମକୁ
ରଖନ୍ତି ଉପାସ ।
ସେବାୟତଙ୍କୁ କରି ଧରାଧରି
କିଛି ଦାମିକା ଭକ୍ତ
ବେଶ୍ ସୁବିଧା ଲୁଟିବାରେ
ସିଦ୍ଧହସ୍ତ ଅଟନ୍ତି ।
ଆଉ କିଛି ନିରୀହ ଭକ୍ତ
ସେମାନଙ୍କ ଠାରୁ
ନିଧୂମ ମାଡ ଗାଳି ଖାଇ
ତୁମ ସାମ୍ନାରେ
ହୁଅନ୍ତି ହାତାହାତି ।
କିଛି ସେବାୟତ
ଏମିତି ବି ଭଣ୍ଡ ଅଛନ୍ତି
ଝିଅ ବୋହୁ ମାନଙ୍କୁ
ଶୋଷଣ କରିବା ସହ
ଖରାପ ବ୍ୟବହାର
ଦେଖଇବାକୁ ସୁଯୋଗର
ଅପେକ୍ଷାରେ ଥାଆନ୍ତି ।
ନେତା, ପ୍ରଶାସକ ଓ ସେବାୟତ
ନିଜ ସୁବିଧା ଓ ସ୍ଵାର୍ଥକୁ
ଦୃଷ୍ଟରେ ରଖି
କେତେବେଳେ ମିଶିଯଆନ୍ତି ତ
ପୁଣି ଅଲଗା ହୁଅନ୍ତି ।
ତୁମ ରତ୍ନ ଭଣ୍ଡାର ଚାବି
କୁଆଡେ ଯାଏ ହଜି
କେହି ପାରନ୍ତିନି ଜାଣି ।
ଶ୍ରୀ ମନ୍ଦିରରେ ଏବେ
ଅଣ ହିନ୍ଦୁ ପ୍ରବେଶ ପ୍ରସଙ୍ଗ
ଜୋର୍ ଧରିଛି
ସେଥିରେ ସାରା ଦୁନିଆ
ପଡୁଛି ଉଠୁଛି ।
ଏବେ ମାନ୍ୟବର
ଉଚ୍ଚତମ ନ୍ୟାୟାଳୟରେ
ଶୁଣାଣି ଚାଲିଛି
ସେଇଠି ହେବ କୁଆଡେ
ସବୁର ଫଇସଲା ।
ଜଗନ୍ନାଥ ହେ
ଏବେ ତୁମେ
ତୁମକୁ ହିଁ ସାହା ।
ତୁମେ ତ ବିଶ୍ଵବାସୀଙ୍କ
ଆରାଧ୍ୟ ଦେବତା
ଆଉ ବି କୁଆଡେ
ବିଶ୍ୱବ୍ରହ୍ମାଣ୍ଡର
ସର୍ବମୟ କର୍ତ୍ତା ।
ପ୍ରଶାନ୍ତ କୁମାର ବେହେରା
ଅଧ୍ୟାପକ , ରାଜନୀତି ବିଜ୍ଞାନ ବିଭାଗ,
ସ୍ୱାମୀ ବିବେକାନନ୍ଦ ସ୍ମାରକ ସ୍ୱୟଂଶାସିତ ମହାବିଦ୍ୟାଳୟ,
ଜଗତସିଂହପୁର ।
ଦୂରଭାଷ - ୯୪୩୭୧୩୫୯୧୬