ଗଣତନ୍ତ୍ରରେ ଭୋଟର ଶକ୍ତି
ଗଣତନ୍ତ୍ରରେ ଭୋଟର ଶକ୍ତି
ରାଜା ରାଜୁଡାଙ୍କ ଶାସନ ଗଲାଣି ଦେଶ ହେବାରୁ ସ୍ୱାଧୀନ
ଏ ଦେଶର ସମ୍ବିଧାନରେ ସ୍ଥାନିତ ହେଲା ଗଣତନ୍ତ୍ର ମାନ ।
ବୃହତ୍ତମ ଗଣତନ୍ତ୍ର ବିଶ୍ୱର ସଙ୍ଘୀୟ ବ୍ୟବସ୍ଥା ଚାଲେ
ରାଜ୍ୟ ମାନେ ଏଠି ସ୍ୱତନ୍ତ୍ର ସ୍ୱାଧୀନ ସମ୍ବିଧାନ ମର୍ଯ୍ୟଦାରେ ।
ପାଞ୍ଚ ବରଷରେ ନିର୍ବାଚନ ହୁଏ ପ୍ରତ୍ୟକ୍ଷ ଭୋଟ ଦେଇ
ଲୋକ ପ୍ରତିନିଧି ନିର୍ବାଚନ କରୁ ବହୁ ଦଳ ଲଢୁଥାଇ ।
ସଂଖ୍ୟା ଗରିଷ୍ଠ ଦଳର ନେତାଙ୍କୁ ରାଷ୍ଟ୍ରପତି ରାଜ୍ୟପାଳ
ନିମନ୍ତ୍ରଣ ଦେବେ ସରକାର ଗଢିବାକୁ ଦେଖି କାଳବେଳ ।
ପ୍ରଭାବିତ କେହି ନକରିବ କା'ରେ ସ୍ୱଛତା ଆଧାର କରି
ଜନତା ବାଛିବେ ନେତାଙ୍କୁ ତାଙ୍କର ବିନା ପ୍ରଲୋଭନ ଡରି ।
ଆଇନ କାନୁନ ହୁଗୁଳା ଏ ଦେଶେ କାଗଜ କଲମ ଲେଖା
ବାହୁବଳ ଅର୍ଥବଳଟି ମାପକ ସ୍ୱଛତା ହୁଏ ବିକା ।
ରାଜତନ୍ତ୍ର ସିନା ଆଇନରେ ନାହିଁ ପରିବାରବାଦ ଚାଲେ
ଥରେ ଯିଏ ଭୋଟ ଜିତିଛି ଆଉ ସେ କ୍ଷମତା ଡୋରି କି ଛାଡେ !
ପୁତ୍ର ନାତି କ୍ରମେ କ୍ଷମତା ଭୋଗନ୍ତି ଆରକ୍ଷଣ ମାନେ ହାର
ପତ୍ନୀ ଭୋଟରେ ନିର୍ବାଚିତ ହେଲେ ପତି କରେ କାରବାର ।
ନିର୍ବାଚନ କମିଶନ କରୁଛନ୍ତି ସଂସ୍କାର ବାରମ୍ବାର
ଆଇନର କଡାକଡି ପାଳନକୁ କରୁଛନ୍ତି ଆଗୁସାର ।
ନୋଟ ନେଇକି ଭୋଟ ଦେବାଟା ଅପରାଧ ମାନ୍ୟ ହୁଏ
ମାଜିଷ୍ଟ୍ରେଟ ଛାପା ମାରି କେତେ ନୋଟ ମଦବି ଜବତ ହୁଏ ।
ଦୁର୍ନୀତିଗ୍ରସ୍ତ କର୍ମଚାରୀଙ୍କ ବଦଳି ଆଦେଶ ହୁଏ
ତଥାପି ଭୋଟର ବାପୁଡା ନିଜକୁ ଅସହାୟ ମଣୁଥାଏ ।
ମୂଲିଆ ହୁଡିଲେ ଦିନେ କଷ୍ଟ ପାଏ ଚାଷୀ ହୁଡିଲେ ବରଷେ
ଭୋଟର ହୁଡିଲେ ପାଞ୍ଚ ବର୍ଷ ଲାଗି କ୍ଷମତା ତା ହାତୁ ଖସେ ।
ଗଣତନ୍ତ୍ରରେ ଭୋଟର ହିଁ ମୂଳ ଏକଥା ନଯିବା ଭୁଲି
ଗୁପ୍ତ ଭୋଟରେ ସୁପ୍ତ ରାଜନୀତି ଅଚୀରେ ଯିବ ବଦଳି ।
ଚିକେନ ମଦର ପ୍ରଲୋଭନ ଛାଡି ନୋଟକୁ ନଅନାଇ
ଭଲ ନେତାଟିଏ ବାଛିବା ଆମର ଦଳକୁ ଦେଖିବା ନାହିଁ।
ଭଲ ନେତାଙ୍କର ଦଳଟିଏ ଯହିଁ ସର୍କାର ଗାଦି ସମ୍ଭାଳେ
ପ୍ରଗତି ଉନ୍ନତି ସ୍ୱଛତା ସେ ଦେଶେ ସୂର୍ଯ୍ୟପ୍ରଭା ସମ ଜଳେ ।
ଜାଗରେ ଭୋଟର ନିଜ ମାନ ବୁଝି କ୍ଷମତା ଦେଖାଅ ଥରେ
ନିଜେ ବଦଳିଲେ ଦେଶ ବଦଳିବ ବିନ୍ଦୁରେ ସିନ୍ଧୁ ଭରେ ।