ଆନନ୍ଦ ଆମେ ପାଉ
ଆନନ୍ଦ ଆମେ ପାଉ
ଗାଆଁରୁ ଏବେ ସହର ଯାଏ
ବୁଲୁଛି ଘିରି ଘିରି ,
ଶୀତ ମାଉସୀ ଦେଇ ଆଉଁଶି
ସଭିଙ୍କୁ ଥିରି ଥିରି ।
କାହାକୁ ଲାଗେ କୁତୁକୁତିଆ
କାହାର ଥରେ ଦେହ,
ସବୁରି ପାଇଁ ଅଜାଡ଼ି ଚାଲେ
ମାଉସୀ ତା'ର ସ୍ନେହ ।
ତାଆରି ଲାଗି ଫୁଲ,ଫଳରେ
ହସି ଉଠୁଛି କ୍ଷେତ ,
ପଦିଆ ଦାଦି ନିଆଁକୁ ଜାଳି
ଉଷୁମ କରେ ହାତ ।
ମାଆଟି କରେ ପାଇଟି ତା'ର
ବଡ଼ି ଭୋଅରୁ ଉଠି ,
ଶୀତ ଲାଗି ସେ ଅଳସ କରି
ଦିଏନା ବେଳ କାଟି ।
ସହର ଠାରୁ ଗାଆଁର ଲୋକ
ସଭିଏଁ ଥରି ଥରି,
ଆପଣା କାମ କରି ଚାଲନ୍ତି
ଶୀତକୁ ମିତ କରି ।
ସବୁ ବରଷ ଆସୁଛି ଶୀତ
ମରତପୁରେ ବୁଲି ,
ତାଆରି ପାଇଁ ନିଜ କାମକୁ
କାହିଁକି ଯିବା ଭୁଲି !
ଖରା,ବରଷା, ବସନ୍ତ,ହିମ-
ଶୀତ ଆସୁ ବା ଯାଉ ,
ନିଜ କାମଟି ସାରି ପାରିଲେ
ଆନନ୍ଦ ଆମେ ପାଉ ।।
ବି. ନିରୁପମା
ମାମୁରିଆ, ଛେଣ୍ଡିପଦା,ଅନୁଗୋଳ ।