ମଳୟ ଗାଉଛି ଗୀତ

ମଳୟ ଗାଉଛି ଗୀତ

 

ଆଭାକାନ୍ତ ମହାନ୍ତି

 

ମଳୟ ଗାଉଛି ଗୀତ ବେପଥୁର ସୁର ତୋଳି,

ପ୍ରଚାରେ ନହୁଲି ପିକ ପିଆଇ ମିଠା ମହୁଲି । ୦ ।

 

ହେ ଦୂର ବାନ୍ଧବୀ ! ତୁମେ

       ବୁଝି କି ପାରୁନ ତାହା,

କାହା ପାଇଁ ଏ ପ୍ରଚାର

       ଏଇ ଗୀତି, ଏଇ ବାଆ ?

ବୁଝନା... ବୁଝନା

       ଆଉ ଜଣକର ଅନ୍ତର ବେଦନା,

ଫିକା ହେଲାଣି ଯା' ମନର ମହକ,

ଅନ୍ତରରେ ଯା'ର ସାହାରା ଡହକ,

ବର୍ତ୍ତମାନରେ ବି ଅତୀତ ପାଥେୟ

       କରିଅଛି ଯିଏ ଖାଲି । ୧ ।

 

ଫଗୁଣର ଫଲ୍ଗୁ ଧାର

       କହୁଥିଲା ମୋତେ ଆସି,

ମନ-ଅଙ୍ଗନ ସଜାଅ

       ନୂଆ ରଙ୍ଗ ଆଣିଅଛି,

ଫେରିଲା... ଫେରିଲା

       ଦୁଇବିନ୍ଦୁ ଲୁହ ଖାଲି ଦେଇଗଲା,

ନିରାଶା ଆଣିଲା ସିନ୍ଧୁ ବିଚିତକ,

ଡୁବାଇଦେଲା ମୋ ଆଶାର କୋଣାର୍କ,

ପ୍ରୀତି-ସ୍ମୃତି ଖାଲି ଖୋଜେ ସାଉଁଟି ମୁଁ

       ଅତୀତ ଦରିଆ ବାଲି । ୨ ।

 

ନୂଆସାହି, ବିଡ଼ାନାସୀ

କଟକ-୭୫୩୦୧୪

ଫୋନ୍-୯୦୪୦୦୦୩୧୦୧

*****