ବଞ୍ଚିବି ବଞ୍ଚିବି,ତାକୁ ବଞ୍ଚାଇବି
ବଞ୍ଚିବି ବଞ୍ଚିବି,ତାକୁ ବଞ୍ଚାଇବି
1 min
4.4K
ସେଇତ ଦୁନିଆଁ
ଯେଉଁ ଦୁନିଆଁ ରେ
ତୁମ ଘର ମୋ'ଘର ।
ତୁମ ଘରେ ଜଳେ
ଲାଵଣ୍ଯ ପ୍ରଦୀପ
ମୋ'ଅଗଣା ଅନ୍ଧକାର ।
ତୁମ ପ୍ରଦୀପରେ
ଘିଅ ଢଳା ହୁଏ
ମୋ'ଦୀପ ଟି ଅନ୍ଧାରୁଆ ।
ଅନ୍ଧାରୁଆ ଦୀପେ
ଆଲୁଅ ଖୋଜି ମୁଁ
ହେଉଅଛି ନିରାଶ୍ରୟା ।
ତୁମେ ବି ଜନନୀ
କୋଳରେ ବଢ଼ିଛ
ମା ପଣତରେ ହସି ।
ଦିନ ବିତାଇଛ
ମମତା ମୟୀଙ୍କ
ହସି ହସି ଖୁସି ଖୁସି ।
କଥାରେ ଶୁଣିଛି
ସୁନ୍ଦର ସଂସାର
ଈଶ୍ୱର ଅଛନ୍ତି ଜଣେ ।
ତାଙ୍କ ଦରବାରେ
ପାତର ଅନ୍ତର
ଭାବି ପାରୁନି ମୋ' ମନେ ।
ଭାବି ମୁଁ ପାରୁନି
କେଉଁ ଅଭିଶାପ
କାହିଁକି ଲାଗିଛି ମୋତେ ।
ଦୁଆରେ ଦୁଆରେ
ରାସ୍ତାରେ ରାସ୍ତାରେ
ବିକଳେ ବଞ୍ଚୁଛି କେତେ !
ମୋ'ଆଖି ଆଗରେ
ଭୋଖିଲା ପେଟରେ
ସାନର ଦରଦ ଦେଖି ।
କେମିତି ମାଗିବି
ମୋ'ପାଇଁକି ଦାନା
ପାରୁନି ମୁଁ ତାହା ଶିଖି ।
ନୀରବ ନୟନେ
ମଥା ପାତି ଦେଇ
ମୋ'ଲୁହକୁ ଦିଏ ପିଇ ।
ବଞ୍ଚିବି ବଞ୍ଚିବି
ତାକୁ ବଞ୍ଚାଇବି
ସେ ଯେ ମୋର ସାନ ଭାଇ ।
ହେ ଠାକୁର ତୁମେ
ନୁହଁ ତ ନିର୍ଦୟ
ମୋ' ଦେହେ ଶକତି ଦିଅ ।
ବିବର୍ଣା ହୁଏ ମୁଁ
ବରଂ ସହିଯିବି
ସାନ ମୁହେଁ ସୁଖ ଦିଅ ।
ଜନମ ନେଇଛି
ବଞ୍ଚିବାକୁ ଅଛି
ନିଜ ପାଇଁ,ଆନ ପାଇଁ ।
ସଂଘର୍ଷ କରିବି
ସଂଗ୍ରାମୀ ସାଜିବି
ତାକୁ ବଞ୍ଚାଇବା ପାଇଁ ।
ଈଶ୍ୱର ଦୁଆର
କରିବି ନିଜର
ମୋ'ମମତା ବାଣ୍ଟି ବାଣ୍ଟି ।
ଏଇତ ଜୀବନ
ମୋ'ଭାଗ୍ୟ ଲିଖନ
କଲି ମୁଁ ତୁମକୁ ସାକ୍ଷୀ ।