ପ୍ରଣୟ ପ୍ରୟାଣ

ଜୀବନ ମୋ ଶ୍ୟାମ ବର୍ଣ୍ଣ

ପ୍ରେମସିକ୍ତା ଶ୍ରୀରାଧାର

ଅସଂପୂର୍ଣ୍ଣ ଅଳୀକ କାମନା,

ପ୍ରଣୟର ରୁଦ୍ରସୁଧା

ପ୍ରୀତିଚ୍ଛ୍ବାସ ନିଃଶବ୍ଦ ଚେତନା ।

କୋଟି ଜନ୍ମ ତପସ୍ୟାର

ପ୍ରାରବ୍ଧର ପୂଣ୍ୟ ଫଳ

ପୂଣ୍ୟ ତୋୟା ଜୀବନ ପାବନୀ ,

ଶ୍ୟାମ ରଙ୍ଗେ ରଙ୍ଗାୟିତ

ଅପୂର୍ବ ତା' ପ୍ରତିଟି ମୂହୁର୍ତ୍ତ

ଶରଧାର ଶୁଦ୍ଧ ସାୟଂତନୀ ।

ଜୀବନ ସେ ସୈକତରେ

ଶ୍ଳେଷହୀନ ମରୁର ଝରଣା

ନିର୍ବିକାର ନିର୍ଲିପ୍ତ ପିପାସା,

ଶୂନ୍ୟ ନୁହେଁ, ପରିପୂର୍ଣ୍ଣ ପ୍ରୀତିପର୍ଣ୍ଣା

ଅପ୍ରମେୟ ବିମୁଗ୍ଧ ଚୈତନ୍ଯ

ଶେଷହୀନ ଅନନ୍ତ ଜୀଗିଷା ।

ପ୍ରମୁଦିତ ପ୍ରୟାସର ପ୍ରମତ୍ତ ଜୀବନ

ପ୍ରମୋଦରେ ସୁଖର ଅନ୍ବେଷା

ପ୍ରମଦାର ନିଭୃତ କାନନ,

ପ୍ରେମ କି'ବା ପ୍ରବୃତ୍ତିର

ଅନାବୃତ ନିବୃତ୍ତିର ମାର୍ଗ

ଜୀବନ କି' ପ୍ରଣୟର

ପ୍ରଲମ୍ବିତ ନିଷିକ୍ତ ପ୍ରୟାଣ !!!

ଭକ୍ତ ଚରଣ ମଲ୍ଲ

ନେମ୍ବରା, କେନ୍ଦ୍ରାପଡା