ଝାରସୁଗୁଡ଼ା
ଝାରସୁଗୁଡ଼ା
ବଦଲି ଗଲା ଝାରସୁଗୁଡ଼ା
ତାର ପାଏନ ପବନ୍
ମାଟିର ବାସ୍ନା,
କାହି ସେ ଝାରସୁଗୁଡ଼ା?
ବାଦଲ କେ ଛୁଉଁ ଥିବାର
ଅମାରତ ତଲେ
ହଜିଗଲା ପୁଆଲ ଖପର
ମାଟିର ଘର |
ନାଇଁ ଶୁଭ ବାର ଆଉ
କୁଇଲିର କୁହୁ କୁହୁ
ମିଠା ଗୀତ,
ହଜି ଯାଇଛେ କାରଖାନାର
ଘଁ ଘାଁ କାନ ଫଟା ଶବଦ|
ନାଇଁ ଦିସବାର ଆଉ ଜଂଗଲ ଝାର
ଜୀବ୍ ଜଁତୁ ଚେରେ ଚିର୍ଗୁନ
ମୁନୁସ ହୁତହୁତ ହଇ
ବଢ଼ବାର ଲାଗି
ବସା ଛାଡ଼ଲେ କାନ୍ଦି ଗଗେଇ
ଗଢ଼ି ଉଠଲା କାର୍ଖାନା |
ପରକୁତିର ମିଠା ସୁଆଦିଆ ପବନ
ହଜିଗଲା କାର୍ଖାନାର
କଲା ମିସମିସ କୁହୁଲା ଥି
ସାଗୁଆ ଗଛ ସବୁ କଲା ଦିସଲା |
ଉନ୍ନତି କରୁଛୁ କି
ଧଁସ ହେବାର ଆଡ଼େ ପାହା
ପକେଇଛୁ, କେ ଜାନେ |
ପରଦେସିଆ ଆସଲେ
ତାକର ଭାସା ସଁସକୁରୁତି ନେଇ |
ମାଁର ଭାସା ହରାଲା
ତାକର ପଛା ଧଏଲା
ଆମର ପୂଜା ପରବ ଛାଡ଼ଲା
ସଁସକୁରୁତି କେ ହିନମାନ
ନଜର କଲା
ଟିକେ ପଢ଼ି ଲେଖି ଶିଖିତ
ହେଲା ଯେ |
ବାଃ ! ଆମେ ଟେଂଗଟା
ହଇଗଲା ଛନେ କେ ବଦଲି
ମାଆର ଭାସା ସଂସକୁରୁତିନୁ
ତ ଶିଖୁଛୁ ଭାବ ପେରେମ
ସେନେହ ମମତା ଗାଲି ଗୁଲଜ,
ଆଉ ଏଛେନ ପାସରି ଦେଲୁ ା
ପର୍କୁତି କେ ତରସ୍ ନରସ୍ କରି
ଉନ୍ନତି ହଉଛେ କି
ଅବସାନ୍ ହେଟା
ବେଲ ଆସଲେ ବୁଝବାର
ସମିଆ ନି ଥିବା |
ପ୍ରସନ୍ନ ପ୍ରୟାସ ଭୁଏ
ପ୍ରଧାନପାଲି, ସମ୍ବଲପୁର