ଅଭିମାନିନୀ ବର୍ଷା

ବାଦଲ ଦୋଳିରେ ଲୁଚକାଳି ଖେଳେ

ଅଭିମାନିନୀ ବରଷା,

ବଧୂବେଶ ସାଜି କଳା ବାଦଲରେ

କରିଛି ଦୁତୀଆ ଓଷା ॥

ଗୁମାନେ ବସିଛି ମୈାସୁମୀ ଆଳୟେ

ଜଳ କୁମ୍ଭ ହାତେ ଧରି,

ଧୋଇଦେବ ବୋଲି ଉଷର ଭୁଇଁକୁ

ବିଜୁଳି ରୋଷଣୀ କରି ॥

ସ୍ୱାଗତ ଜଣାଏ ଝଡିପୋକ ଉଡି

ଖଦ୍ୟୋତ ଜଳାଏ ବତୀ,

ଝିଂକାରୀ ଶୁଣାଏ ସ୍ୱାଗତ ସଂଗୀତ

ରୁଷେ ବର୍ଷା ମୈାନାବତୀ ॥

କାହିଁ କୋପକରି ଢାଳୁଥାଉ ନୀର

କେଉଁଠି ଫାଟଇ ଭୂଇଁ,

କୃଷକ ବାପୁଡା ମୁଣ୍ତେ ହାତ ଦେଇ

କାନ୍ଦୁଅଛି କଇଁକଇଁ ॥

ବେଂଗ ବେଂଗୁଲିଏ ଗର୍ତ୍ତେ ଲୁଚିଲେଣି

ତୃଷାର୍ତ୍ତରେ ପୁଷ୍କରିଣୀ,

ତଟିନୀ ହୃଦୟ କେଡେ ନିରିଦୟ

ଶାନ୍ତ ହୁଅ ବର୍ଷା ରାଣୀ ॥

ଜୀବ ଜଗତଟା ବାହୁନି କାନ୍ଦୁଛି

ଜଳାଭାବେ ହାହାକାର,

ସକଳ ଜୀବର ତୁ ମା ସଂଜୀବନି

କିମ୍ପା ଏତେ ତୁ ନିଷ୍ଠୁର ॥

ତୋ ଆଶିଷ ହେଲେ ହସିବ ଜଗତ

ହସିବ ଏ ବସୁନ୍ଧରା,

ରୁକ୍ଷ ଭୂଇଁ ହେବ ସବୁଜ ବଳୟ

ହସିବେ ଜଗତ ସାରା ॥

ତୋ ପାଦେ ବନ୍ଦନା କରେ ଏ ଜଗତ

ମାନ ତେଜ ବର୍ଷା ରାଣୀ,

ବୁହାଇ ତୋ ଧାର ପ୍ରାଣୀଂକୁ ଉଦ୍ଧାର

ସଭିଏଁ କରୁ ମାଗୁଣି ॥

----ଗୈାରାଂଗ ଚରଣ ବେଉରା----

----ଶିକ୍ଷକ କୁଲିଆମାଲ ଉଚ୍ଚ ବିଦ୍ୟାଳୟ---

ମୋବାଇଲ ନଂ-9438684827

[e-mail]