କଥାଟିଏ କହୁଁ କଥାଟିଏ-୨

କଥାଟିଏ କହୁଁ କଥାଟିଏ-୨

ଅମଳିନ ତାଙ୍କ ଯଶ

ପଞ୍ଚାୟତିରାଜ ଦିବସଟି ଆଜ

ପାଳନ୍ତି ଓଡ଼ିଶାବାସୀ ,

ମହାନାୟକଙ୍କ ଜନମ ତିଥିରେ

ସଭିଙ୍କର ମନ ଖୁସି ।

ବୀର ,ସ୍ୱାଭିମାନି,ଆଦର୍ଶର ଖଣି

ତ୍ୟାଗର ସେ ପ୍ରତିମୂର୍ତ୍ତି ,

ଓଡ଼ିଶାବାସୀଙ୍କ ହୃଦୟକୁ ଜିଣି

ହୋଇଥିଲେ ମୁଖ୍ୟମନ୍ତ୍ରୀ ।

ଶାସନ କାଳରେ ଜନ କଲ୍ୟାଣରେ

ହୋଇକରି ସିଏ ବ୍ରତୀ ,

କେତେ କେତେ କାର୍ଯ୍ୟ କରି ଯାଇଛନ୍ତି

ଲେଖିଲେ ହୋଇବ ପୋଥି ।

ସୁଶାସନ ଲାଗି, ତିରିଶଟି ଜିଲ୍ଲା

କରିଥିଲେ ସେ ଘୋଷଣା,

ମହିଳା ସଶକ୍ତିକରଣ ପାଇଁକି

ଗଢିଲେ କେତେ ଯୋଜନା।

'ସାମାଜିକ ଆଉ ଆର୍ଥିକ ଦୃଷ୍ଟିରୁ

ହେଲେ ନାରୀ ସ୍ୱାବଲମ୍ବୀ ,

ରାଷ୍ଟ୍ର ଗଠନରେ ଆମ ଯୋଗଦାନ

ହୋଇବ ଗଗନଶ୍ଚୁମ୍ବୀ ।'

ରାଜନୀତି କ୍ଷେତ୍ରେ ମହିଳାଙ୍କ ପାଇଁ

ପଞ୍ଚାୟତ ସ୍ତରେ ସେହି,

ଶହେରୁ ତେତିଶ ଭାଗ ସ୍ଥାନ ରଖି

ଥିଲେ ଚହଳ ପକାଇ ।

ସ୍ୱୟଂସହାୟକ ଗୋଷ୍ଠୀ ମୂଳଦୁଆ

ସ୍ଥାପନ କରି ସେ ପୁଣି,

ମହିଳାଙ୍କୁ ଭିନ୍ନ ପରିଚୟ ଦେଇ

ହୋଇଲେ ମଉଡ଼ମଣି ।

ଭୁବନେଶ୍ୱରରେ କୃଷି ବିଜ୍ଞାନର 

ବିଶ୍ୱବିଦ୍ୟାଳୟ ସାଥେ,

ଆଞ୍ଚଳିକ ଗବେଷଣା କେନ୍ଦ୍ର ଆଉ

ସୈନିକ ସ୍କୁଲ ଯେ ସତେ ।

ବୁର୍ଲା ମେଡିକାଲ କଲେଜ ସାଙ୍ଗକୁ

ଇଂଜିନିୟରିଂ କଲେଜ,

ତାଳଚେର ଠାରେ ତାପଜ ବିଦ୍ୟୁତ

କେନ୍ଦ୍ର ଗୋଟି ମନେ ହେଜ ।

ଚଉଦୁଆରରେ ଲୁଗା କାରଖାନା

ପାରାଦ୍ୱୀପରେ ବନ୍ଦର ,

ସୁନାବେଡ଼ାରେ ଯେ ବିମାନ ତିଆରି

କାରଖାନାଟି ସୁନ୍ଦର ।

ବିଜ୍ଞାନ କ୍ଷେତ୍ରର ପ୍ରସାର ପାଇଁକି

ଆନ୍ତର୍ଜାତିକ ସ୍ତରରେ ,

କଳିଙ୍ଗ ପୁରସ୍କାର ଗୋଟି ପ୍ରତିଷ୍ଠା 

କରିଛନ୍ତି ସେବେଳରେ ।

ତାଙ୍କ ଲାଗି ଆଜି ଓଡ଼ିଶା ସାଜିଛି 

ଅନ୍ୟ ରାଜ୍ୟଙ୍କ ଆଦର୍ଶ ,

ସେହି ରାଜନେତା 'ବିଜୁବାବୁ' ଆମ

ଅମଳିନ ତାଙ୍କ ଯଶ ।।

ବି. ନିରୁପମା

ମାମୁରିଆ, ଛେଣ୍ଡିପଦା,ଅନୁଗୋଳ ।