ଭାରି ଉଚ୍ଚ କପାଳି
ଭାରି ଉଚ୍ଚ କପାଳି
ଭୁରୁ ଭୁରୁ ବାସ ଛାଟି ଫୁଟିଲାଣି ଶେଫାଳି ,
ରାତିକର ଅତିଥି ସେ ଭାରି ଉଚ୍ଚ କପାଳି।
ମନଲୋଭା ସୁଗନ୍ଧ ତା' ଚଉଦିଗେ ଛୁଟଇ ,
ସୁରୁଜ ଉଇଁଲେ ସିଏ ଧରା ପରେ ଲୋଟଇ ।
ଏଡ଼େ ରୂପବତୀ ବୋଲି ନାହିଁ ଜମା ଗରବ,
ଫୁଲ ରାଇଜର ପରା ସେ ଅମୂଲ୍ୟ ଦରବ ।
ଘଡିକର ଜୀବନ ତା' ଭାଳି ଦୁଃଖ କରେନା,
ସେ ବିଷାଦେ ଦରଫୁଟା ହୋଇ ଜମା ଝରେନା ।
ବିଧାତା ସରଜିଛନ୍ତି ଯା'କୁ ଯେଉଁ ଆଶରେ ,
ଅମାନ୍ୟ କରିଲେ ତାକୁ ମିଳିବ କି ଯଶରେ ।
ଏ କଥାକୁ ହେଜ ରଖି ହସି ସେ ତ ଲୋଟଇ,
ସେ ମହତ ଗୁଣ ଲାଗି ଶିବ ଶିରେ ଲୋଟଇ ।
ବି. ନିରୁପମା
ମାମୁରିଆ, ଛେଣ୍ଡିପଦା,ଅନୁଗୋଳ।