ମୁଁ ଓଡ଼ିଆ(ଶିଶୁ କବିତା)

ଓଡିଶା ମୋ ଜନ୍ମ ମାଟି

ମୋ ଠାକୁର କାଳିଆ,

ଓଡ଼ିଆଣୀ ମାଆ ମୋର

ଲାଗେ ଭାରି ବଢିଆ l

ଓଡିଶୀ ଛଉ ମୋ ନାଚ

ପାଲା ଦାସ କାଠିଆ,

ଛାନ୍ଦ ଅଳଙ୍କାର ଭରା

ମାତୃଭାଷା ଓଡ଼ିଆ l

ଧୋତି କୁରୁତା ମୋ ବେଶ

ଘର ଚାଳ କୁଡିଆ,

ଶାଗ ପଖାଳ ମୋ ଖାଦ୍ୟ

ଲାଗେ ଭାରି ବଢିଆ l

କୁଳ ବେଉଷା ମୋ ବୃତ୍ତି

କରେ ପିଢି ପିଢିଆ,

ଚାଷ, ବଢେଇ, କମାର

ମିଠା ଗଢା ଗୁଡ଼ିଆ l

ଭୋଗ ପ୍ରତି ନାହିଁ ଲୋଭ

ରୋଗ ରହେ ଦୁରିଆ,

ଖଚ, ମିଛ, ଚୋରି, ହାରି

ଲାଗେ ମୋତେ ଅଡୁଆ l

ସଞ୍ଜ ସଳିତା ମୋ ଭାବ

ବିଶ୍ୱାସ ମୋ କାଳିଆ,

ଆପଦ ବିପଦ ବେଳେ

ଭାଙ୍ଗି ଦିଏ ନଡ଼ିଆ l

ମାଟି ମାଆ ସୁରକ୍ଷାର

ପାଇକ ମୁଁ ଲଢ଼ୁଆ,

କାରିଗରୀ କଳା ଦେଖି

ବିଶ୍ଵ ମାରେ ମୁଣ୍ଡିଆ l

ତା ବଣ ପାହାଡ଼ ଶୋଭା

ନଇ ବନ୍ଧ ଗାଡିଆ

ସେମାନେ ମୋ ଚିର ସାଥି

ଲାଗେ ଭାରି ବଢିଆ ….