ନାରୀ ମୁଁ
ନାରୀ ମୁଁ
ଲୋଡ଼ା ନାହିଁ ପକ୍ଷ ମୋର
ଲୋଡା ନାହିଁ ସ୍ବାଧୀନତା
ନାହିଁ ଆକାଶରେ ମୋ ଉଡିବାର ସ୍ବପ୍ନ
ନାରୀ ମୁଁ -
ଏ ଧରାକୁ ସୁନ୍ଦର କରିବାରେ
ମୋର ଆଗ୍ରହ କେବଳ !
ସମୁଦ୍ରର ବିଶାଳ ଗର୍ଭରେ
ନ ହଜୁ ମୋ ଛୋଟିଆ ଅସ୍ତିତ୍ଵ
ବେଳାଭୂମିରେ ପାଦ ଚିହ୍ନ ପରି
ଯୁଗ ଯୁଗ ଧରି
ସମସ୍ତଙ୍କ ହୃଦୟରେ
ରହୁ ମୋର ଛାପ ।
ପାହାଡ଼ ପର୍ବତ ସବୁଜିମା
ସମସ୍ତେ ମୋ ପ୍ରେରଣାର ଉତ୍ସ
ଅନ୍ଧାରଠୁ ଶିଖିଅଛି
ବିନା ଆଲୋକରେ ଚାଲିବାକୁ ବାଟ
ନାରୀ ମୁଁ
'ନାହିଁ'ରୁ ବି ଖୋଜି ଆଣିପାରେ
'ହଁ' ପାଇଁ ଏକ ସ୍ଥାନ ସୁରକ୍ଷିତ !
ଦୁର୍ଗା କାଳୀଙ୍କର ରୂପ
ଅବା ଧରିତ୍ରୀର ମୁଁ କ୍ଷୁଦ୍ର କଣିକା
କରେନି ଚିନ୍ତା କେବେ
ମୋ ଗର୍ଭରୁ ଜାତ ଏ ବିଶାଳ ଦୁନିଆରେ
କେତେ ମୁଁ ଅଳୀକ
ମୁଁ ଖାଲି ଜାଣିଅଛି -
ନାରୀ ମୁଁ,
ଆଉ ଏତିକି ହିଁ ମୋର
ସର୍ବଶ୍ରେଷ୍ଠ ପରିଚୟ !!!