କରେ ନୃତ୍ୟ ପ୍ରଦର୍ଶନ

           

ତୁମଲାଗି ଆଜି ଛନ୍ଦ ତୋଳୁଛି ମୁଁ

ଗୀତ ଗୋବିନ୍ଦର ସୁରେ ,

ଚକାଆଖି ମେଲି ଦେଖୁଥାଅ ପ୍ରଭୋ

ଏତିକି ମିନତି କରେ ।

କଳାନିଧି ତୁମ କଳାରୁ ଟିକିଏ

କରିଅଛ ବୋଲି ଦାନ ,

ଶୋଭାମୟୀ ସାଜି ଠାଣି ଚାହାଣିରେ

କରେ ନୃତ୍ୟ ପ୍ରଦର୍ଶନ ।

କୁଞ୍ଜବନ କେଳି ଗୋପିଙ୍କର ମେଳି

ରାଗ,ରୁଷା-ପରିହାସ ,

ଅଙ୍ଗଭଙ୍ଗୀ ତୋଳି ତୁମ ଆଗେ ପୁଣି

ରଚୁଅଛି ମୁହିଁ ରାସ ।

ଫେରି ଯାଉଅଛି ଦ୍ଵାପର ଯୁଗକୁ

ଯମୁନା କୂଳର ତଟେ ,

ଗୋପାଳୁଣୀଙ୍କର ସଙ୍ଗତରେ ତୁମେ

ରଚିଥିଲ ଲୀଳା ଯେତେ ।

ଗୋଟି ଗୋଟି କରି ସେଇ ଗାଥାମାନ

ପରିପ୍ରକାଶୁଛି ନୃତ୍ୟେ ,

ତୁମରି ହୃଦୟ ପ୍ରଫୁଲ୍ଲିତ ହେଲେ

ଅଭ୍ୟାସିବି ଅଗ୍ରେ ନିତ୍ୟେ ।।