ଭାରତ ପଙ୍କଜେ ଦଳ
ଭାରତ ପଙ୍କଜେ ଦଳ
ଭାରତ ପଂକଜ ଦଳରେ ବିରାଜ
. ଉତ୍କଳ କେଶର ପରି
ଉତ୍କଳର ସମ ଦେଶ ନାହିଁ ଆନ
. ଚତୁର୍ଦ୍ଧାମେ ଶ୍ରେଷ୍ଠ ପୁରୀ ।୧।
ଗିରି ମେଘାସନ ମୁକୁଟ ସମାନ
. ସାଗର ଯାର ଗାରିମା
ମହାନଦୀ ଜାଣି କଟିର କିଂକିଣି
. ପଣତ ଯା’ ସବୁଜିମା ।୨।
ଅଂଶୁପା ଚିଲିକା ବେନି ନେତ ଆଖ୍ୟା
. ନାସିକା ଯା’ ଖଣ୍ଡା ଧାର
ଅଟ୍ରି ତପ୍ତପାଣି ସ୍ତନ୍ୟ ଧାର ବେନି
. ହୀରାକୁଦ ହୀରା ହାର ।୩।
ଥିଲା ଯାର ଦିନେ ସୀମା ପଡେ ମନେ
. ଗଂଗାଠାରୁ ଗୋଦାବରୀ
କୀରତି କୋଣାର୍କ. ରାଜାରାଣୀ ଟେକ
. ଜଗନ୍ନାଥ ଧାମ ପୁରୀ ।୪।
ସମ୍ ବଲପୁର. ସମ୍ ବଳ ବୀର
. ବାନ୍ଧ କଳା ଯାର ଖ୍ୟାତି
ଗୋଟିପୁଅ ନାଚ ଛଉ ସମରତ
. ସମ୍ବଲପୁରୀ ଓଡିଶୀ ।୫।
ପାଇକ ବିଦ୍ରୋହ ଜୟୀ ରାଜଗୁରୁ
. ଧରମା ବାଜି ରାଉତ
ବାଘା ଯତି ସାଇଁ. ସୁରଇନ୍ଦ୍ର ସାଇ
. ଲକ୍ଷ୍ମଣ ଦେଶ ଭକତ ।୬।
ଗଉରବ ଯାର. ମଧୁ ବାରିଷ୍ଟର
. ଗୋପବନ୍ଧୁ ଯାର ମଣି
ଗୋଦାବରି ଈଶ. ନୀଳକଣ୍ଠ ଦାସ
. ବକୁଳ ବନ ବିନ୍ଧାଣି ।୭।
ପଠାଣି ସାମନ୍ତ ଯାବତ ଚନ୍ଦ୍ରାର୍କ
. ଥିବ ସିଦ୍ଧାନ୍ତ ଦର୍ପଣ
ଜୟ ଜୟଦେବ. ଶ୍ରୀ ଗୀତ ଗୋବିନ୍ଦ
. ଲଳିତ କଳିତ ଗାନ ।୮।
ପଂଚସଖା ସତ. ଅଚ୍ୟୁତ ଅନନ୍ତ
. ବଳରାମ ଯଶୋବନ୍ତ
ଦାସ ଜଗନ୍ନାଥ. ଅତିବଡୀ ଖ୍ୟାତ
. ରଚି ଉଡ୍ର ଭାଗବତ ।୯।
କବିକୁଳ କଂଜ. ଉପଇନ୍ଦ୍ର ଭଂଜ
. ସାରଳା ଯେ ଶୁଦ୍ରମୁନି
ସ୍ଵଭାବେ ବିଭୋର ହୋଇ ଗଂଗାଧର
. ଭଣିଲେ ସେ ତପସ୍ୱିନୀ ।୧୦।
ଅଭିମନ୍ୟୁ ବୈଷ ଦୀନକୃଷ୍ଣ ଦାସ
. କବି ସୂର୍ଯ୍ୟ ଦେବ ବଳ
ଯଦୁମଣି ଘଣ୍ଟ. ପଲ୍ଲୀ କବି ଆଣ୍ଟ
. ନନ୍ଦ କିଶୋର ବଳ।୧୧।
ବ୍ୟାସ କବି ନ୍ୟାସ. କଥା ଉପନ୍ୟାସ
. ରାଧାନାଥ କବିବର
ବଇଷ୍ଣବ ପାଣି ଗଣ କବି ଗଣି
. କାଳୀ ଚରଣ କବିଚନ୍ଦ୍ର।୧୨।
ପ୍ରହରାଜ ଗୋପ ଶବଦ ଆଟୋପ
ପୂର୍ଣ୍ଣ ଚନ୍ଦ୍ର ଭାଷା କୋଷ
ରାଜା ପୂର୍ଣଚନ୍ଦ୍ର. ଶିରୀ ରାମ ଚନ୍ଦ୍ର
. ରିକ୍ତ କଲେ ରାଜକୋଷ ।୧୩।
ଶ୍ରୀରାଧା ବିଖ୍ୟାତ. ରମାକାନ୍ତ ରଥ
. ଯଶ ମାନ ସରସ୍ୱତୀ
ଅମୃତ ଫଳ କଥା ଯାର ବଳ
. ମନୋଜ ଉଡ୍ର ଭାରତୀ ୧୪।
ଗୋପୀ ମହାନ୍ତି ମାଟିମଟାଳ ରଚି
. ଜ୍ଞାନପୀଠ ପୁରସ୍କାର
ସଚ୍ଚି କୋଣାରକେ ସାମଗ୍ରିକେ ପରା
. ସୀତାକାନ୍ତ ମହାପାତ୍ର ।୧୫।
ପ୍ରତିଭା ରାୟଙ୍କ ଯାଜ୍ଞସେନୀ ଛୁଂକ
. ଲଭିଲେ ସେ ଜ୍ଞାନପୀଠ
କୁନ୍ତଳା କୁମାରୀ ନାରୀ କବି ଶୀରି
. ମାୟାଧର ପ୍ରେମ ପାଠ ।୧୬।
ଐର ଖାରବେଳ. ପ୍ରତାପ କପିଳ
. ଯଯାତି କେଶରୀ ଗୀର
ଇନଣ୍ଡୋନେସିଆର ଭୂମି ପୁତ୍ର ବର
. କଳିଂଗର ବୀଜୁ ବୀର ।୧୭।
ମାତା ରମାଦେବୀ. ସଂସାର ବରଜି
. ହେଲେ ବାପୁ ଅନୁଗାମୀ
ମାଳତୀ ନଂଦିନୀ. ତୁଳସୀ ସୁମନି
. ଗରବିତ ଓଡିଆଣୀ ।୧୮।
ଓଡିଶୀ ର ମଣି. ସୋନାଲ କୁଂକୁମ
. ସଂଯୁକ୍ତା ପାଣି ଆଉ କେ !
ଦଉଡର ରାଣୀ ଦୂତୀ ଚାଂଦ ଭଣି
. ଶରଧାଂଜଳି କନ୍ଦୁକେ ।୧୯।
ବାଲୁକା କଳାରେ ବିଶ୍ଵ ଦରବାରେ
. ସୁଦର୍ଶନ ଉଚ୍ଚ ମଥା
ଉତ୍କଳର ନାଥ. ସ୍ଵୟଂ ଜଗନ୍ନାଥ
. ଗାଇବା ଉତ୍କଳ ଗାଥା !୨୦।