ଦାରୁବ୍ରହ୍ମ,ଅହିତରେ ହିତ

ପୁଷ୍ପ ଗୁଚ୍ଛ ଉପହାର ମୋତେ

ଲୋଡ଼ା ନାହିଁ,

ଲୋଡ଼ା ତୁମ ହୃଦୟର

ତୁଳସୀ କଣିକା ।

ଷାଠିଏ ପଉଟି ଭୋଗ ମୋତେ

ଜଣା ନାହିଁ,

ମନ ଖୋଜେ ମମତାର

ତୁମରି ଅଇଁଠା ।

ବିପ୍ଳବ କରିବା ପାଇଁ ଜମା

ଶିଖି ନାହିଁ

ଶିଖିଛି ମୁଁ ସାଧନା ଓ

ଦୁର୍ବାର ସଂଗ୍ରାମ ।

ଦେଖା ପଣିଆରେ କେବେ ନୁହେଁ

ଦେଇଛି ମୁଁ

ଅନ୍ତରର ପ୍ରେମ ଭକ୍ତି

ହୃଦୟ କଣିକା ।

ଆନନ୍ଦ ବଜାର ଯାଇ କେବେ

କିଣି ନାଇଁ

ଖାଇବାକୁ ଅନ୍ନଭୋଗ,

ଅମୁଲ୍ୟ ପ୍ରସାଦ ।

ବାଇଶି ପାହାଚ ପରେ କେବେ

ବସି ନାହିଁ

ପାଇବାକୁ ତୁମ ଶୁଭ୍ର

ରୂପ ଦରଶନ ।

ମୋ'ହୃଦୟ ମନ୍ଦିରରେ ରଖି

ଦେଖୁଅଛି

ତୁମ ସେଇ ଦିବ୍ୟ ରୂପ

ଦିବ୍ୟ ଦରଶନ ।

ସନ୍ନ୍ୟାସୀ ନୁହେଁ ମୁଁ, ମାତ୍ର ଜଣେ

ସାଂସାରୀକ

ସଂସାରର ଜଞ୍ଜାଳରେ

ଜଞ୍ଜାଳ ଜର୍ଜିତ ।

କ୍ଷମଣିବ ଭୁଲିଯିବି ଯେବେ

ତୁମ ନାମ

ତୁମେ ପରା ଦାରୁବ୍ରହ୍ମ

ଅହିତରେ ହିତ ।