ପୁଣ୍ୟଦା ଦୀପାଳି
ପୁଣ୍ୟଦା ଦୀପାଳି
1 min
6.9K
ହୈମନ୍ତିନୀ,ଶୁଭ୍ରା, ପୁଣ୍ୟଦା ,ଦୀପାଳି
ମୁରୁଜ ଓଢଣୀ ନେଇ,
ଅଗଣା ମଣ୍ଡିଲ ଆଲୋକ ସଜ୍ଜାରେ
ରୂପସୀ ପର୍ବାଣୀ ହୋଇ ।
ସିମନ୍ତିନୀ ପାଇଁ ସହଚରୀ ସାଜି
ଦୀପରେ ଦୀପ ମିଶାଇ,
ବସୁଧା ବାସକୁ କ୍ଷୀପ୍ର ଆଲୋକରେ
ସପ୍ତ ସୁରେ ଦେଲ ଧୋଇ ।
ତୁମ ଆଗମାନେ ଲକ୍ଷ୍ମୀଙ୍କ ଆସନେ
ରୋଷଣୀ ମେଳା ଲାଗିଲା ,
ପଦ୍ମାଳୟା କୋଳେ ଶୁଭ୍ରତାକୁ ନେଇ
ଫୁଲେଇ ଫୁଲ ହସିଲା ।
ଚହଟ ବରଣୀ ଚମ୍ପାର ଓଢଣୀ
ସରମେ ଝାଉଁଳି ଗଲା ,
ପଦ୍ମ ପତରରେ ଶିଶିର କଣିକା
ସମ୍ମାନେ ସ୍ୱାଗତ କଲା ।
ଅନ୍ଧ ଅହମିକା ହୋଇଗଲା ଫିକା
ଅଜ୍ଞାନେ ଅଙ୍କୁଶ ଆଙ୍କି,
ତୁମ ଶୁଭ୍ରତାର ମୃଦୁ ପରଶରେ
ନିରାଶା ନଇଁଲା ଶଙ୍କି ।
ସାମ୍ୟବାଦର ସମ୍ଭାଷଣ ଦେଇ
ଅଗଣା ଅଗଣା ଯାଇ,
ଶାନ୍ତି ମୈତ୍ରୀର ସଂରକ୍ଷିତ ଶ୍ଲୋକ
ଗୁଳ୍ମେ ଗୁଳ୍ମେ ଗଲ ଗାଇ ।
ଘର ଘର ଯାଇ ଘୋର ଅନ୍ଧକାର
ନିମିଷେ ଉଭେଇ ଗଲା,
ଓଢଣୀ ଉହାଡ଼େ ନିଝୁମ ନିଶା ବି
ନିଜ ମୁହଁ ଲୁଚାଇଲା ।
ସଲପ ସମୟେ ବିନମ୍ର ବିନୟେ
ନିଜର ଆଲୁଅ ଦେଇ,
ବନ୍ଧୁବାଦର ବଳିଷ୍ଠ ବିଜ୍ଞାନ
ପଲକେ ଗଲ ଶିଖାଇ ।