ଚୁମ୍ବନ
ଚୁମ୍ବନ
ଚୁମ୍ବନ
ଚୁମ୍ବନଟିଏ ଦେଲାବେଳେ
ତୁମେ ଏମିତି ବ୍ୟବହାର କର
ଯେମିତି ତୁମେ
ପ୍ରତିକ୍ରିୟାହୀନ ବ୍ଲାକବୋର୍ଡଟିଏ
ତା ଉପରେ ମୁଁ ଲେଖେ ଆଉ ଲିଭାଏ
ଯେତେ ଚୁମ୍ବନ
ସେ ସବୁ ମିଛ
ସେଥିରେ ତୁମର ଭୂମିକା କିଛି ନାହିଁ
କ୍ଷାନ୍ତ ହୁଏ ମୁଁ
କ୍ଷଣିକ ପାଇଁ
ପୋଛି ସଫା କରିଦିଏ ତୁମ ମୁହଁ
ଝାଡିଦିଏ ହାତରୁ ଚକ ପାଉଡର
ତୁମ ଆଡକୁ ପିଠି କରି
ପଢ଼ାଇ ଚାଲେ ମୋ ମନ ଶ୍ରେଣୀରେ
ଇଚ୍ଛା ମାନଙ୍କୁ
ବିନା ବ୍ଲାକ ବୋର୍ଡର ସହାୟତାରେ
କେତେକ ଇଚ୍ଛା ତ ଥରକରେ ବୁଝି ଯାଆନ୍ତି
ଆଉ କେତେ ଜଣ ବୁଝନ୍ତିନି
ବିଲକୁଲ କିଛି
ସେଇ ଅମାନିଆଁ ଇଚ୍ଛାମାନେ
ମାନନ୍ତିନି ମୋ ତର୍ଜମା
ମୋ ହାତ ଗୋଡ ହଲା
ଆହୁରି ଭଲରେ
ବୁଝାଇବାକୁ କହନ୍ତି
ଦରକାର ପଡ଼ିଲେ ଉଦାହରଣ ସହ
ମୁଁ ପୁଣି ମୁହଁ ବୁଲାଇ
ଲେଉଟି ଚାହେଁ ତୁମକୁ
ଏଇ ଟିକିଏ ପୂର୍ବରୁ
ସଫା କରିଥିବା ତୁମର ସେ ମୁହଁକୁ
ଦେଖେ, ଯେମିତି ସେ ଅଲେଖା ମୁହଁରେ
ନୂଆ ଏକ ଆମନ୍ତ୍ରଣ,
ପୁଣି ନୂଆ ଖାଲିପଣ
ମୁଁ ପାଖକୁ ଲାଗିଆସେ
ଆଉ କିଛି ଲେଖିଦିଏ ସେଠି
ପୁଣି ସେହି ମୁହଁ ଛିଞ୍ଚଡା ..
ଇଏ ହେଲା ପୁଣି ମୋ ଭୁଲର
ସହସ୍ରତମ ପୁନରାବୃତ୍ତି...
ଦୁଇ ହାତରେ ପୁଣି ଛାତିଠାରୁ
ଟିକିଏ ଦୂରକୁ ଠେଲି ଦିଅ
ଅଦ୍ଭୁତ ଏ ଅନୁଭବ
ଏମିତି ବି ବ୍ଲାକ ବୋର୍ଡ ଥାଆନ୍ତି
ଯିଏ ଚକ୍ କୁ ପାଖକୁ ଡାକି କହନ୍ତି
"ସବୁବେଳେ ପାଖେ ପାଖେ ଥାଅ,
କିନ୍ତୁ କିଛି ଲେଖନି "