ଆସ ନେବା ଶପଥ
ଆସ ନେବା ଶପଥ
ହେ ନର ଦେବତା, ଆସିଚି ବାରତା
ଆଉ କେଇଟା ଦିନ ବାକି
ଶେଷ ଦିନ ଆସି ପହଁଚିଗଲାଣି
ତାହା କେବେ ଭାବିଛି କି ?
ଜଳ ପ୍ରଦୂଷିତ, ପବନ ଦୂଷିତ
ଉଷ୍ଣତା ଚାଲେ ବଢି
ଶୀତକାଳ ଦିନ ଥଣ୍ଡା ବିହୀନ
ଆସିବ କେମିତି ଫେରି ।
ବରଷାର ଦିନ ବରଷାବିହୀନ
ବଞ୍ଚିବେ କେମିତି ଚାଷୀ
କୁଆଡେ କୁଆଡେ ଘୋର ବରଷାରେ
ସବୁ ତ ଗଲାଣି ଭାସି ।
ପ୍ରକୃତିର ଖେଳ କିଏ ବୁଝି ପାର
ଆସ ଆହେ ବିଜ୍ଞାନୀ
ଆସ ରାଜନେତା, ଦେଶର କରତା
ଆସ ସବୁ ଜ୍ଞାନୀ ଗୁଣୀ ।
ମିଛ ଖେଳ ଛାଡି, ନିଜକୁ ସୁଧାରି
ଆସ ଆମେ ନେବା ଶିକ୍ଷା
ପରିବେଶ ଲାଗି ଚାଲ ଯିବା ମାଗି
ଶପଥର ବାଣୀ ଭିକ୍ଷା ।
ରକ୍ଷା କରିବୁ, ବଣ ଜଙ୍ଗଲ
ଜଳବାୟୁ ପରିବେଶ
ସୁସ୍ଥ ସମାଜ ଗଢି ଦେଇ ଆମେ
ବଞ୍ଚାଇବୁ ମହାଦେଶ ।
ରକ୍ଷା କରିବୁ କୀଟ ପଶୁପକ୍ଷୀ
ବସୁନ୍ଧରାର ମାଟି
ଭବିଷ୍ୟତ ପାଇଁ ଦେବୁ ସଜ କରି
ସୁନ୍ଦର ପରିପାଟୀ ।
ଗଛ ଲଗାଇବୁ, ବଗିଚା କରିବୁ
ଗଢି ଦେବୁ ଆମେ ଜଙ୍ଗଲ
ଫଳେ ଆଉ ଫୁଲେ ଭରି ଯିବ ଦେଶ
ହେବ ଜଗତର ମଙ୍ଗଳ ।
ଆମ ପିଲାପିଲି ସୁଖରେ ରହିବେ
କରିବୁ ହିଁ ସେହି କାମ
କରିବା ଶପଥ ହାତେ ହାତ ରଖି
ବଞ୍ଚାଇବୁ ଧରାଧାମ ।
ଜଗତ ମଝିରେ ଆମେ ଏକ ଜାତି
ଆମେ ହି ଶ୍ରେଷ୍ଠ, ମାନବ
ଆମ ହାତରେ ତ ସବୁ କିଛି ଅଛି
ଆମେ କ’ଣ ନର ଦାନବ ?