ସୁନ୍ଦରୀ ମୌସୁମୀ

ମୌସୁମୀ ଆସିଛି ଧରିତ୍ରୀ ହସୁଛି

ଖୁସିରେ ଭାସୁଛି ମହୀ

ସବୁ ମହଲରେ ଚାଲିଛି ଚର୍ଚ୍ଚା

ସୁନ୍ଦରୀ ମୌସୁମୀ ପାଇଁ ॥

ପହିଲି ବରଷାଛିଟାରେ ଭିଜିଛି

ଶୁଖିଲା ମନର ମାଟି

ଆଉ କିଛିଦିନ ତୁମର ବିଳମ୍ବେ

ହୃଦୟଟା ଯାନ୍ତା ଫାଟି ॥

ଲାଗି ଝାଂଜିଖରା ପ୍ରେମତରୁ ପରା

ଝାଉଁଳି ସେ ପଡିଥିଲା

ତୁମରି ଶୀତଳ ସମୀର ସ୍ପର୍ଶେ

ପୁନଃ ଜୀବନ ପାଇଲା ॥

କି ଦିନ କି ରାତି ତୁମ ପ୍ରତୀକ୍ଷାରେ

ସମୟଟା ଆନମନା

ତୁମ ଆଗମନେ ସବୁରି ଜୀବନେ

ପ୍ରୀତିମୟ ସବୁଜିମା ॥

ଘନ ଅନ୍ଧକାରେ ପହିଲି ଦେଖାରେ

ବେଙ୍ଗୁଲୀ ଗାଇଲା ଗୀତ

ହୃଦୟ କ୍ଷେତରେ ସପନ ପଥରେ

କୃଷକ ହୋଇଲା ମିତ ॥

ମନଉପବନେ ଫୁଟିଲା କୁସୁମ

ଛୁଟିଲା ସେ ଚଉଦିଗ

ତୁମେ ଆଉ ଥରେ ଅଣଦେଖା ହେଲେ

ଯନ୍ତ୍ରଣାଟା ହେବ ଭୋଗ ॥

ଶରତ ଚନ୍ଦ୍ର ଜାଲି,ପଥରା

ତା:୧/୭/୧୮