ପାରୁଛ ଯଦି ଫେରିଆସ

ତୁମର ସବୁ ଛଳନା ଆଗରେ

ହରାଇଛି ମୋର ସମସ୍ତ

ନୀତି ଓ ଆଦର୍ଶ l

ସବୁ ବାହାନା ଆଗରେ ତୁମର

ଜଳାଞ୍ଜଳି ଦେଇଛି ସବୁ

ମହତ୍ତ୍ୱକୁ ମୋର l

ଆଉ ତୁମ ପ୍ରତାରଣା ଆଗରେ

ସମର୍ପି ଦେଇଛି ମୋର

ସବୁ ମର୍ଯ୍ୟାଦାକୁ l

ତୁମର ସେଇ ସବୁ

ଛଳନା, ବାହାନା ଓ ପ୍ରତାରଣାରେ

ହୋଇଛି ମୁଁ ପଥଭ୍ରଷ୍ଟ, ଉଦଭ୍ରାନ୍ତ ଓ ବିଶୃଙ୍ଖଳ l

ହରାଇ ଦେଇଛି

ତୁମ ମିଛ ସାନ୍ନିଧ୍ୟରେ

ମୋ ନିଜର ସମସ୍ତ

ମାନବୀୟ ଗୁଣବତ୍ତା l

ତୁମର ମୋହାବିଷ୍ଚ

ଚେନାଏ ହସରେ

ପାଇଥିଲି ଶାନ୍ତି, ତୃପ୍ତି

ଆଉ ସବୁକିଛି l

ଏମିତି କ'ଣ ସତରେ

ଦିଆଯାଏ ବିଷ

ମୋ ପରି ଅସହାୟ, ନିରୁପାୟ

ଆଉ ସରଳ ଲୋକଟିକୁ ?

କୁହାଯାଏ ପରା

ପ୍ରମରେ ଥାଏ ସମର୍ପଣ

ଆଉ ଦୁଇଟି ଆତ୍ମାର ମିଳନ l

ତଥାପି ଏବେବି ସନ୍ତୁଳି ହେଉଛି

ତୁମ ପ୍ରେମ ଆଶ୍ଲେଷରେ

ଅବୈଧ ସ୍ୱପ୍ନ ମାନଙ୍କୁ ସାଙ୍ଗରେ ଧରି l

ପାରୁଛ ଯଦି ଫେରିଆସ

ଏବେ ବି ଗଢିବା ବସି

ଆମ ପ୍ରେମର

ସୁନ୍ଦର ତାଜମହଲଟିଏ l

-------------

ପ୍ରଶାନ୍ତ କୁମାର ବେହେରା

ଅଧ୍ଯାପକ , ରାଜନୀତି ବିଜ୍ଞାନ ବିଭାଗ,

ସ୍ୱାମୀ ବିବେକାନନ୍ଦ ସ୍ମାରକ ସ୍ୱୟଂଶାସିତ ମହାବିଦ୍ୟାଳୟ,

ଜଗତସିଂହପୁର l

ଦୂରଭାଷ - ୯୪୩୭୧୩୫୯୧୬