ଉତ୍ତର ମିଳିଲା ଜେଜେଙ୍କ ଠାରୁ
ଉତ୍ତର ମିଳିଲା ଜେଜେଙ୍କ ଠାରୁ
ଲକ୍ଷ୍ମୀପ୍ରିୟା ଦାସ
ଦୁଇ ସାଙ୍ଗ ବସି କଥା ହେଉଥିଲେ
ଅଲମ୍ପିକ୍ ର ବିଷୟେ
ଦୁହିଁଙ୍କ ମନରେ ପ୍ରଶ୍ନଟିଏ ଥିଲା
ପଚାରି ନ ଥିଲା ଭୟେ ,l
ଅଲମ୍ପିକ୍ ଖେଳ ପତାକାଟି ଧଳା
ଉଡୁଥିଲା ଫର ଫର,
ଛନ୍ଦା ଛନ୍ଦି ହୋଇ ପାଞ୍ଚୋଟି ବଳୟ
ସେଥିରେ ପାଞ୍ଚ ରଙ୍ଗର l
ନାଲିଆ, ସବୁଜ, ହଳଦିଆ, ନୀଳ
କଳା ରଙ୍ଗ ବଳୟର,
ବଳୟ ଗୁଡିକ ପ୍ରତୀକ ଅଟନ୍ତି
ପାଞ୍ଚଟି ମହାଦେଶର l
ପୃଥିବୀରେ ଅଛି ସାତ ମହାଦେଶ
ପତାକାରେ ପାଞ୍ଚ କିଆଁ ?
ଉତ୍ତର କାହାଠୁ ପଚାରି ବୁଝିବେ
ଭାବି ହୋଇଲେ ଛାନିଆଁ l
ଜେଜେଙ୍କୁ ଶେଷରେ ପଚାରିଲେ ଯାଇ
ଜେଜେ ପାନ ଖଣ୍ଡେ ଖାଇ
କହିଲେ ଗମ୍ଭୀରେ, ‘’ ପତାକାରେ ତେବେ
ଦୁଇ ମହାଦେଶ ନାହିଁ l ‘’
ଏସିଆ, ଆଫିକା, ଇରୋପ ସହ
ଆମେରିକା,ଅଷ୍ଟ୍ରେଲିଆ,
ସବୁ ଅଛି ହେଲେ ଆଣ୍ଟାର୍କଟିକା ନାହିଁ
ଏମିତିକା ହେଲା କିଆଁ !
ଉତ୍ତର, ଦକ୍ଷିଣ ଆମେରିକା ପାଇଁ
ଖାଲି ଆମେରିକା ଅଛି,
ହେଲେ ଆଣ୍ଟାର୍କଟିକାରେ କେହି ଲୋକ ନାହିଁ
ଶୁଣି ଦୁହେଁ ହସ ହସ l
ଜେଜେଙ୍କୁ କହିଲେ,’’ ପାକୁଆ ପାଟିରେ
ଅଛି ଜ୍ଞାନର ଭଣ୍ଡାର,
ଉତ୍ତର ରହିଛି ଚନ୍ଦା ମୁଣ୍ଡଟିରେ
ସବୁ କଠିନ ପ୍ରଶ୍ନର l ‘’
ସଊପ ପକାଇ ଦାଣ୍ଡ ପିଣ୍ଡାଟାରେ
ଜେଜେ ଯାଇଥିଲେ ବସି,
ସ୍ନେହେ ଆଉଁଶିଲେ ଦୁହିଁଙ୍କ ମୁଣ୍ଡକୁ
ମୁରୁକି ମୁରୁକି ହସି l