ଗଣ୍ଠି
ଗଣ୍ଠି
ସମ୍ପର୍କର ଜଉଘରେ
ନିଆଁ ଥରେ ଲାଗିଗଲା ପରେ
ହୁତୁହୁତୁ ଜଳୁଥିବା ହୃଦୟକୁ
କିଏ ବା କେମିତି ଲିଭେଇ ପାରେ !
ମାନ ଅଭିମାନ କ୍ରୋଧ ଘୃଣା ସାଙ୍ଗେ
ଈର୍ଷା ଅସୂୟାକୁ ନେଇ
ବାଟ ଚାଲୁଥିବା ବେଳେ
କାହାର ଶୀତଳ ପରଷ
ସେ ଅବୁଝା ମନକୁ କ’ଣ
ଆଉ ସତରେ ଫେରେଇ ଆଣିପାରେ !
ସଂପର୍କର ଡୋରି ଛିଡିଯାଇଛି
ଦୂରେଇ ଯାଇଛି ମନ
ତା’ର ଅତି ଆପଣାର ମନ ପାଖରୁ
ତୁମେ ଚେଷ୍ଟା କରୁଛ
ଯୋଡି ଦେବାକୁ ତାକୁ ପୂର୍ବ ପରି !
କିନ୍ତୁ ସେ ଯୋଡ ପାଖରେ
ପଡିଥିବା ଗଣ୍ଠିକୁ
କେମିତି ଲୁଚେଇ ପାରିବ ତୁମେ
ମୋ ଆଖି ଆଗରୁ
ଯାହା ରହିଗଲା ସେଠି ଚିରଦିନ ପାଇଁ !
ଦୁଃଖର କଥା ଏଇଆ ଯେ
ଯେତେ ଆଖି ବୁଜିବାର ଛଳନା କଲେ ବି
ସେ ଗଣ୍ଠିକୁ
ଏବେ ସୁଦ୍ଧା ଅନ୍ଧାରରେ
ମୁଁ ସ୍ପଷ୍ଟ ଦେଖିପାରେ !!
-0-