ଜଣେ ଜାଣେ
ଜଣେ ଜାଣେ
ରୋମାଣ୍ଟିକ କବି ମାୟାଧର ମାନସିଂହ
ବସୁଧାର ହୃଦ-ବ୍ୟଥା ଜାଣେ ବାରିବାହ,
ଅମୃତ-ଆସାରେ କରି ତା'ରେ ଅବଗାହ
ରୋମାଂଚିତ କରେ ଶସ୍ୟେ ।କୁସୁମ-ବ୍ୟଥିତ
ତପନ ଜାଣଇ ମାତ୍ର,ପ୍ରଭାତେ ଚୁମ୍ବିତ
ଧୀରେ କରି,କରେ ତାରେ ସୁରଭି-ସୁନ୍ଦର,
ହସାଏ କ୍ଷଣକ ଲାଗି ।ଶୁଭ ନୀଳାମ୍ବର
ଆଲୋକର ବ୍ୟଥା ବୁଝେ ।ନୀରବ ନିଶୀଥ
ପ୍ରେମିକର ବ୍ୟଥା ବୁଝେ- ପ୍ରେୟସୀ- ଶିଞ୍ଜିତ
ଶୁଣାଇ ଶ୍ରବଣେ ତା'ର ।ନିଖିଳ ଭୁବନେ
ବୁଝିବାକୁ ଜଣକର ବ୍ୟଥା ଆଉ ଜଣେ
ସୃଜିଛି ପରମ ସ୍ରଷ୍ଟା; ବିଶ୍ଵଜନତାରେ
ସକଳେ ଉପେକ୍ଷି, ଚିତ୍ତ ବାଛିନିଏ ତାରେ
ଜୀବନ-ସଙ୍ଗିନୀ କରି ।ସେହି ସେ ବିଧାନେ
ପ୍ରିୟା-ପ୍ରାଣ ଯୁକ୍ତ ହେଲା ଏ ଅଧମ ପ୍ରାଣେ ।
ସମାପ୍ତ