ନୀଳ ଆକାଶରେ ମେଘର କୁନ୍ତଳ
ନୀଳ ଆକାଶରେ ମେଘର କୁନ୍ତଳ
ମହାସ୍ମୀତା
ନୀଳ ଆକାଶରେ ମେଘର କୁନ୍ତଳ,
ବରଷାର ମୋତି ଝରେ l
ଧୂସର ଏ ମୋର ମରୁଭୂମି ତୀରେ,
ବରଷାକୁ ନିତି ଝୁରେ।
ତମେତ ଆସୁଛ ଦରିଆ ସେପାରୁ,
ସପନ ବଣିକ ହୋଇ,
ବରଷା ଝରୁଛି ଫୁଲ ଓ ପତ୍ରରେ
ନୂତନ ସର୍ଜନା ପାଇଁ।
ବର୍ଷା ବିଭୋର କବିପଣ ମୋର,
କଲମତ ଲେଖୁଥାଉ l
କିଛି ଅଧାଲେଖା କାହାଣୀ ଲେଖିଛି,
ଅକୁହା ତ କିଛି ଥାଉ।
ବର୍ଷା ନାଚୁଛି ସକାଳ ପ୍ରହରୁ,
ଥମିବାର ଆଶା ନାହିଁ l
ବରଷା ଆଣିଛି ନିନ୍ଦାର ନୁପୂର
ମୋ ପାଦେ ବାନ୍ଧିବା ପାଇଁ।
ବରଷା ଆସିଲେ ତୁମେ ମନେପଡ
ଭିଜା ଭିଜା ଲାଗେ ମନ l
ବରଷା ସାଙ୍ଗରେ ପାଦ ପାଉଁଜି ମୋ,
ବାଜୁଥାଏ ଝନ୍ ଝନ୍।
ଚାଲ ଆଜି ଆମେ ମେଘ ବରଷାରେ,
ଯିବା ପୁଣି ଭିଜି ଭିଜି l
ଜୀବନ,ମରଣ,ମୋକ୍ଷ ଓ ନିର୍ବାଣ
ସବୁ ଆଜି ଯିବ ହଜି।