ପାଇକ ବିଦ୍ରୋହ ସ୍ମୃତିରେ
ପାଇକ ବିଦ୍ରୋହ ସ୍ମୃତିରେ
ସ୍ୱାଧୀନତା ତା'ର ଦେବନାହିଁ ବୋଲି
ଦୟା ନଦୀ କଲା ଶୋଣିତେ ଭରା
ଚଣ୍ଡାଶୋକ ଯହିଁ ଧର୍ମାଶୋକ ହେଲା
ସେହି ମାଟି ଏହି ଓଡ଼ିଶା ପରା ।
ଫିରଂଗୀ ସେନା
ତା ଛାତିରେ ଉଡାଇବକି ବାନା !
ଗଜପତି ରାଜା ପାଇକ ପରଜା
ଖୋରଧା ବୀର ଯା କୀରତି ଗାଥା
ଫିରିଙ୍ଗି ସେନାଙ୍କ ବନ୍ଧୁକ ଗୁଳି କୁ
ଖଣ୍ଡା ଧନୁତୀର କି ସମରଥା !
ବୀର ପାଇକ
ଗରିଲା ଯୁଦ୍ଧରେ କରିଲା ରୋକ ।
ବକ୍ସି ଜଗବନ୍ଧୁ ଧରାପଡ଼ି ଶେଷେ
ମରଣକୁ ସୁଖେ ବରଣ କଲେ
ଜୟୀ ରାଜଗୁରୁ ବିଦ୍ରୋହ ବିସ୍ତାରୁ
ହସିହସି ଫାଶି ଖୁଣ୍ଟେ ଝୁଲିଲେ ।
ଲକ୍ଷଣ ନାୟକ
ବ୍ରହ୍ମପୁର ଜେଲ ଗଲା କାଳକ ।
ଛଳବଳ ଆଗେ ବଳ ନପାଇଲା
ସ୍ୱାଧୀନତା ହାରି ମୁକୁନ୍ଦ ଦେବ
ଗଂଗା ଗୋଦାବରୀ ଥିଲା ଯେ ଆବୋରି
ଖଣ୍ଡ ବିଖଣ୍ଡିତ ତା ସୀମା ହେବ !
ପାଇକ ବୀର
ସ୍ମୃତି ଦୁଇ ଶହ ବର୍ଷ ତଳର ।
ଖଣ୍ଡଗିରି ଯା'ର ମହିମା ପ୍ରକାଶେ
ପୁରୀ କୋଣାରକ ଯାହାର କୀର୍ତ୍ତି
ଦେଖାଶୁଣା ଗୁଣେ ଓଡ଼ିଆ ବଖାଣେ
ହେଲା କାହିଁ ଆଜ ଦୁର୍ବଳ ମତି !
ଧରମା ବାଜି
ଜାତି ପାଇଁ ଦେଲେ ପରାଣ ବାଜି ।
ଯଯାତି କେଶରୀ ମର୍କତ କେଶରୀ
ଐର ଖାରବେଳ ପ୍ରତାପରୁଦ୍ର
ପୂର୍ବ ଶୂରୀ ଯା'ର କାହାକୁ ବା ଡର
ମଧୁ ଗୋପବନ୍ଧୁ ଯା କର୍ଣ୍ଣଧାର ।
ବୀର ଓଡ଼ିଆ
ଅସ୍ମିତା ସୁମରି ଫୁଲାଅ ହିଆ ।