ଜୀବନ ଗୀତା-୧୯

 

ଜୀବନ ବଜାରେ ଖୁସି ବିକାହୁଏ ନାହିଁ

ହସ ବି ତ ମିଳେନାହିଁ

ମନର ଦରଜ କମାଇବା ପାଇଁ କେଉଁ

ମଲମ ବି ମିଳେନାହିଁ ॥୦॥

 

ସପନ ସଉଦାଗର ବିକେ ଖୁସି ନିତି

ନୟନର ବିପଣିରେ

ଆଶାର ଝରଣା ଉଛୁଳି ବହଇ ସିନା

ଖୋଜି ସୁଖ ପାରାବାରେ

ହସର ଝଂକାର ତୋଳଇ ଓଁକାର

ହସଖୁସି ଭରା ଜୀବନ ନାଟକେ ପୁଣି

ଯବନିକା ଆସେ ନଇଁ ॥୧॥

 

ସବୁ ସପନ ତ ସତ ହୁଏନା ଜୀବନେ

କିଛି ଅଧା ରହିଯାଏ

ସ୍ୱପ୍ନ ପୂରା କରୁକରୁ ନିଅଣ୍ଟ ଆୟୁଷ

ପ୍ରାଣପକ୍ଷୀ ଉଡିଯାଏ

ନଥିଲେ ସପନ ଅସାର ଜୀବନ

ଦୁଃଖ ବୈତରଣୀ ବଢିବଢି ଯାଉଥାଏ

ବିପଦ ସଂକେତ ଛୁଇଁ ॥୨॥