ରଜ (ବ୍ୟଙ୍ଗ)
ରଜ (ବ୍ୟଙ୍ଗ)
ବରଷକ ପରେ ପୁଣି ଆଉ ଥରେ
ରଜଟା ଗାଁକୁ ଆସିଛି
ଗାଁ ସିନା ଲାଗେ ଖାଲି ଖାଲି ହେଲେ
ପାର୍କଟା ପୁରି ଯାଉଛି ।
ଯେଉଁଠି ଦେଖିବ ଯୋଡି ଜାଉଁଳିଙ୍କ
ବଳ କଷା କଷି ଚାଲିଛି
ରଜ ପରମ୍ପରା ହେଲାଣି ପୁରୁଣା
ସହରି ସଭ୍ୟତା ମାତିଛି ।
ରଜ ଆସିଗଲେ ଫିଲିମି ନିର୍ମାତା
ନୂଆ ଫିଲିମିଟେ କରୁଛି
ଭିଣୋଇ ସାଥିରେ ଶାଳୀ ଯାଇ ସେଠି
କଣୁଆ ସିଇଟି ଖୋଜୁଛି ।
ପିଠାପଣା ପରା ହେଲାଣି ପୁରୁଣା
କିଏ ସେ ସେଗୁଡା ଖାଉଛି
ବାରରେ ଯାଇ ଅଧାରାତି ଯାଏ
ଫରେନ ଲିକ୍ୱାର ପିଉଛି ।
ବେଳ ଦୁଇଘଡି ହେଲାଣି ଆସିକି
ବୋହୁଟା ଖଟରେ ଶୋଇଛି
ଦୋଳି ଖେଳିବାକୁ ନାତି ଟୋକା ପରା
ପ୍ରେମିକା ସାଥିରେ ଯାଇଛି ।
ବିଅର ବୋତଲ ହସେ କିରି କିରି
ଚିକିଣା ଖାସିଟା କାନ୍ଦୁଛି
କଂସେଇ ତାହାର କଟୁରି ସଜେଇ
ଗ୍ରାହକକୁ ଚାହିଁ ବସିଛି ।
କୁଆଁରୀ ଝିଅଟା ଦେହରେ ତାହାର
ଚାଖଣ୍ଡେ ପୋଷାକ ପିନ୍ଧିଛି
ଯୁବକଙ୍କୁ ଖୁସି କରିବା ପାଇଁକି
ଦିସ୍କୋ ଡ୍ୟାନସ କରୁଛି ।
ଦୋଳି ଖେଳିବାକୁ କହିଦେଇ ଝିଅ
ଆମ୍ବ ତୋଟା ଆଡେ ଯାଇଛି
ଭଲ ସେ ଯାହାକୁ ପାଉଥିଲା କାଳେ
ସେହି ତୋଟା ଆଡେ ଆଇଛି ।
ଦେଖି ନେଇ କାଳେ ଚିହ୍ନିଦେଵ କିଏ
ମୁହଁରେ କପଡା ବାନ୍ଧିଛି
ହଅଟ ହଅଟ ଦିଶିବ ବୋଲିକି
ଟାଇଟି ଜିନସ ପିନ୍ଧିଛି ।
ପରମ୍ପରା ଏବେ ବଞ୍ଚି ଅଛି ବୋଲି
ଅଜାକୁ ଆଈ ମୋ କହୁଛି
ପାକୁଆ ପାଟିରେ ଖିଲିପାନ ଖାଇ
ଓଠ ତାର ନାଲି କରୁଛି ।
ବୁଢ଼ାବି ତାହାର ଘରଣୀ ପାଇଁକି
ଦୋଳିଟେ ବାଡ଼ିରେ ବାନ୍ଧିଛି
ହଳ କରିବାକୁ ବିଲକୁ ନଯାଇ
ନୂଆ ଧୋତି ଖଣ୍ଡେ ପିନ୍ଧିଛି ।
ପୋଡ଼ ପିଠା କରି ଆଇଟା ମୋହର
ପତିକୁ ତାହାର ଖୋଉଛି
ଏହି କଥା ଦେଖି ଭାବିଲି ସତରେ
ଆଜିବି ରଜଟା ବଂଚିଛି ।
ପ୍ରଶାନ୍ତ କୁମାର ନାଥ