ଠାକୁରେ ଯାଉଛ କାହିଁ

ଠାକୁରେ ଯାଉଛ କାହିଁ

ରହିବ କି ଟିକେ ମାଗୁଅଛି ଭିକେ

ଦୁଃଖ ଶୁଣାଇବା ପାଇଁ ।

ନବଦିନ ପାଇଁ ମନ୍ଦିରୁ ବାହାରି

ସାରିଲ ତ ଯାତ୍ରା ଶୁଣିଲ କାହାରି

ଆକୁଳ ଭାରତେ ସନ୍ତାନ ଆରତେ

ସହନ୍ତି ଟାପରା ଟାହି

ବାହୁଡି ଯାଉଛ କାହିଁ ?

ଆର୍ତ୍ତତ୍ରାଣ ତୁମେ ଆସିଥିଲ ପରା

ପତିତ ଉଦ୍ଧାରି ଉଶ୍ଵାସିବ ଧରା

ପାଇଲ କି ଲାଭ ଯୋଡ଼ି ଏତେ ଭାବ

ରାତି ଯାଇନାହିଁ ପାହି

ଶୁଭୁଅଛି ତ୍ରାହି ତ୍ରାହି ।

ଆସିଛି ଆଜି ମୁଁ ନିଜେ ଥିବି ସାକ୍ଷୀ

ମୋ ମାଟି ମାଆର କେତେ ନିରିମାଖି

ଭୋକିଲା ଉଦରେ ମୁଠାଏ ଖୁଦରେ

ଜୀଇଁବା ଭରସା ନାହିଁ

ଦେଖ ହେ ପଛକୁ ଚାହିଁ ।

ଭାଗ୍ୟେ ଲେଖାନାହିଁ ଖାଇବା ବକତେ

ବଳୀ ଖେଳେ ଛଳି ଅବଳା ରକତେ

କେ କରେ ଧର୍ଷଣ କେ ଦିଏ କଷଣ

ହିସାବ ତାହାର ନାହିଁ

ଭାବି ଦେଖ ଆହେ ସାଇଁ ।

ଲହୁ ଆଉ ଲୁହ ଝରିଯାଏ ଯେତେ

ସେଥିପାଇଁ କୁହ ଦୋଷ କା'ର କେତେ

ହୁଏ କା' ହରଣ କେ ବରେ ମରଣ

କୁହ ତେବେ କାହାପାଇଁ

ତୁମେ ହିଁ ସବୁରି ଦାୟୀ ।

ଜାତି ଧର୍ମ ନାମେ ଏଠି ଦୈତ୍ୟ ଗଣ

ଭାଇ ଭାଇ ମଧ୍ୟେ ଭିଆଇଲେ ରଣ

କେ ଅବା ଅଧମ ଜାଳିଲା ସଦମ

ସାଧୁବେଶେ ରହି ଥାଇ

ତୁଣ୍ଡେ ତୁମ ନାମ ଗାଇ ।

ଧର୍ମଯୁଦ୍ଧ ଆଉ ଦେଶଭକ୍ତି ନାମେ

ଖଳ ହେଲେ ଠୁଳ ତୁମ ଏହି ଧାମେ

କରି ଆତ୍ମତୋଷ ଲଦିଲେଣି ଦୋଷ

ଆଉ କାହା ମୁଣ୍ଡେ ଯାଇ

କୁହ ଦେଖୁଛ କି ନାହିଁ ?

ତୁମକୁ ଦେବତା କରିଛି ଧନିକ

ବିକି ତୁମ ନାଆଁ ସାଜିଛି ବଣିକ

ତାହିରି ମାୟାରେ ତୁମରି ଛାୟାରେ

ଭ୍ରଷ୍ଟାଚାର କିସ ପାଇଁ

ପଚାରୁଛି ଆସି ଧାଇଁ ।

ଅଭିଯୋଗ ଅଛି ଆହୁରି କ୍ରମିକ

ତୁମ ରାମରାଜ୍ୟେ ଏ ଶିଶୁ ଶ୍ରମିକ

ପାଇଛି କି ଫଳ ହୁଏ ତ ବିଫଳ

ଅଶ୍ରୁଜଳେ ଅବଗାହି

ଦେଉଛି ତୁମକୁ ଦ୍ବାହି ।

ରଖିଅଛ ପରା ଖଣ୍ଡା ବାରହାତ

କେବେ ଆଉ ହେବ ଦୈତ୍ଯଙ୍କ ନିପାତ

କରୁଣାନିଧାନ କର ହେ ବିଧାନ

ଆରତଜନଙ୍କୁ ଚାହିଁ

ଅବତାର ଗଲା କାହିଁ ?

ପ୍ରସନ୍ନ କୁମାର ମାଦଳା

ଘର ନଂ - ଏଫ୍ / ୧୩

ସେକ୍ଟର - ୪