ନାରୀ
ନାରୀ
କବିସୌରଭ ଅନୁପ ସିଂହ ଦେବ
ରାଜା ଖଡ଼ିଆଳ
ମାୟାବିନୀ ତୁମେ ନାରୀ ! ମାୟାର ମନ୍ତରେ
ପାର ତୁମେ ମରୁ ବୁକେ ନିରତେ ବୁହାଇ
ନିର୍ଝରିଣୀ ଧାରା, ମେଘ ଗଳେ ପାର ତୁମେ
ଦୋହଲାଇ ବରଷାର ମାଳା,ବିଂଛିପାର
ବସନ୍ତ-ମଳୟ-ବାତ ତପ୍ତ ଗ୍ରୀଷ୍ମ ବକ୍ଷେ ।
ହରିପାର ନିମିଷକେ ଅବଶ ପାନ୍ଥର
ଘୋର ଶ୍ରମ ତାପ, ଦିବ୍ୟ ମନ-ବ୍ରଜେ
ପାର ରଚି ରାସଲୀଳା,ଗୋପ ନାରୀ ସମ ।
ନିରିମଳ ହୃଦ-ନଭେ ମହ୍ଲାର ସଙ୍ଗୀତ
ଗାଇପାର ତୁମେ ଛାଇ ନିରାଶା ବାଦଲ ।
ଦୀପକ ରାଗିଣୀ ଗାଇପାର ତୁମେ,ଜାଳି
ଆଶାୟୀ ପ୍ରଣୟୀ-ହିଆ,ନଗ୍ନ ଚିତା ସମ ।
ନାରୀ !
କେଉଁ ଯାଦୁକର ହସ୍ତେ ଗଢ଼ା ତବ ତନୁ,
ମନ,ପ୍ରାଣ ; ବୁଝି ହୁଏ ନାହିଁ ସେ ଅନ୍ତର ।
ସମାପ୍ତ