ରାସ୍ତା କଡର ଜୀବନ
ରାସ୍ତା କଡର ଜୀବନ
ଏଇ ରାସ୍ତା କଡର
ଜୀବନ୍ତ ମଣିଷମାନଙ୍କୁ ଯେପରି
ଚିଡିଆଖାନାର ଜୀବଜନ୍ତୁ ପରି
ଆଶ୍ଚର୍ଯ୍ୟ ଚକିତ ଦୃଷ୍ଟିରେ
ଦେଖି ଦେଖି ଏଠି
ଥିଲାବାଲା ପୁଞ୍ଜିପତି ଭାବନ୍ତି
ଏ ଗୋଟେ କି ଜୀବନ ?
ଇଏ ତ ଖାଲି
ନାହିଁ ନାହିଁର ଜୀବନ,
ଏ ଜୀବନର ମୂଲ୍ୟ କିବା କୁହତ ?
ସତରେ ଏ ରାସ୍ତା କଡର ଜୀବନ
ଆଜି ଏଠି ତ କାଲି ସେଠି ।
ଏମିତି ଜୀବନ
ଜୀଉଁଥିବା ଲୋକଙ୍କର
ଘର ପାଇଁ ଆବଶ୍ୟକତା ପଡେନି
ରଡ୍, ଗୋଡି,ଇଟା,ବାଲି କି ସିମେଣ୍ଟ ।
ଏ ଜୀବନରେ କୌଣସି
ଗର୍ବ ଅଂହକାର ନାହିଁ ।
ଛନ୍ଦ କପଟ କଣ
ଏମାନେ ଜାଣନ୍ତି ନାହିଁ ।
ବ୍ଲଡ୍ ପ୍ରେସର୍ କି ଡାଇବେଟିସ୍
ତାଙ୍କ ପାଖ ମାଡିବାର ନାହିଁ ।
ଅତୀତର କଥା
କିଛି ଭାବିବାର ନାହିଁ ।
ଭବିଷ୍ୟତର କୌଣସି
ଯୋଜନାରେ ମାତିବାର ନାହିଁ ।
ଜୀବନ ପ୍ରତି ଅହେତୁକ
ମୋହ ନାହିଁ କିମ୍ବା
ମୃତ୍ୟୁକୁ ଭୟ ବି ନାହିଁ ।
ଏ ଜୀବନରେ କିଛି
ଜାକଜମକ ନାହିଁ ।
ବିବାହ ବାର୍ଷିକୀ କି ଜନ୍ମଦିନ
ପାଳନ କରିବାର ନାହିଁ ।
ସେସବୁ ତିଥି ତାରିଖ ବାର
ସେମାନେ ମନରେ ରଖନ୍ତି ନାହିଁ ।
ସ୍ୱପ୍ନ ଦେଖିବାର ନାହିଁ
କିମ୍ବା ଜୀବନ ଯୁଦ୍ଧରେ
ହାରିଯିବାର ଭୟ ବି ନାହିଁ ।
ଅନ୍ୟ କାହାଠୁ କିଛି
ମାରିନେବାର ଅଭିପ୍ରାୟ ବି ନାହିଁ ।
ସେମାନେ ବର୍ତ୍ତମାନରେ
କେବଳ ଜୀଇଁବା ଶିଖିଛନ୍ତି ।
ନୀରବତା ହିଁ ତାଙ୍କ ଭାଷା
କର୍ମ ହିଁ ତାଙ୍କ ଜୀବନ ।
ଖଟିଲେ ଖାଇବେ
ନମିଳିଲେ କାହା ପାଖରେ
ଅଭିଯୋଗ କାରିବାର ନାହିଁ ।
ସତରେ ଏଇ ନାହିଁ ନାହିଁର ଜୀବନ
କେବଳ କଣ ତାଙ୍କ ପାଇଁ ଉଦ୍ଦିଷ୍ଟ ?
ତଥାପି ସେଠି ହିଁ
ଦେଖି ହୁଏ ଅନାବିଳ ପ୍ରେମ
ନିରୁତା ଭଲପାଇବା
ଆଉ ଅଳ୍ପରେ ସନ୍ତୁଷ୍ଟି ହେବାର
ସମସ୍ତ ମନୋଭାବର ଲକ୍ଷଣ ।
..........
ପ୍ରଶାନ୍ତ କୁମାର ବେହେରା
ଅଧ୍ୟାପକ , ରାଜନୀତି ବିଜ୍ଞାନ ବିଭାଗ,
ସ୍ୱାମୀ ବିବେକାନନ୍ଦ ସ୍ମାରକ ସ୍ୱୟଂ ଶାସିତ ମହାବିଦ୍ୟାଳୟ,
ଜଗତସିଂହପୁର ।
ଦୂରଭାଷ - ୯୪୩୭୧୩୫୯୧୬