ମୋ ଗାଆଁରେ ଶୀତ ସକାଳ

ଶୀତ ସକାଳ ଗାଁରେ ମୋହର

ହୋଇଛି ଆସି ଉଭା

ଫୁଲ ଫଳରେ ସଜେଇ ହୁଏ

ଧରଣୀ ମାଆ ଗଭା ।

ଘାସ ଉପରେ କାକର ପଡି

ଝଟକି ଦିଶୁଅଛି

ସତେ ଯେମିତି କାକର ନୁହେଁ

ମୁକୁତା ସଜେଇଛି ।

ପନି ପରିବା ବାଡ଼ିରେ ହସେ

ସବୁଜ ଦିଶେ ଧରା

ଦେହକୁ ଏବେ ଭଲ ଲାଗୁଛି

ଶୀତ ସକାଳ ଖରା ।

ରାସ୍ତାକଡରେ ନିଆଁ ଲଗେଇ

ହୁଅନ୍ତି ସବୁ ମେଳ

ହାତକୁ ସେକି ଗାଲେ ଥାପନ୍ତି

ଥଣ୍ଡା ହେଲେ ପ୍ରବଳ ।

ସ୍ବେଟର ଆଉ ଚାଦର ଟୋପି

ଦେହ ଘୋଡାଉ ଥାଏ

ଗରମ ଚାହା ପିଇବା ପାଇଁ

ମନଟା ଖୁସି ହୁଏ ।

ଧୂଆଁ ପରିକା ଚାରି ପାଖରୁ

କୁହୁଡି ଆସେ ମାଡି

ପାଣିର ଟୋପା ଏମିତି ଝରେ

ସତେ ବରଷା ଝଡି ।

ଆମ୍ବ ଗଛରେ ମୁରୁକି ହସେ

ହଳଦି ରଙ୍ଗ ବଉଳ 

ଭାରି ନିଆରା ସୁନ୍ଦର ଲାଗେ

ଗାଆଁ ଶୀତ ସକାଳ ।