ଜହ୍ନର ନଗରୀ
ଜହ୍ନର ନଗରୀ
ଝାପସା ପାହାଡର ସେପାରିରେ,
ଚାନ୍ଦ ନଗରୀର ବଜାରରେ ,
ତାରକାଙ୍କ ପ୍ରବଳ ଗହଳି ।
ସୁଖର ମାଦକତା
ଶାନ୍ତିର ଶୀତଳତା
ସତ୍ଯ ର କୋମଳତା,
ଅହିଂସା ଓ ନ୍ଯାୟର ଉଜ୍ଜ୍ବଳତା,
ସବୁ କିଛିର ବିକ୍ରି ଓ କ୍ରୟ ଚାଲିଛି ।
ଚାନ୍ଦର ଚାନ୍ଦିନୀ ଉଦ୍ଭାସିତ ହେଉଛି ,
ଜହ୍ନ ନଗରୀକୁ ଆଲୋକିତ କରି
ଝାପସା ପାହାଡ ଧିରେ ଧିରେ ଆଖି ମେଲୁଛି,
ଅନାଉଛି ସେଇ ଜହ୍ନର ବଜାରକୁ ।
ଯିବ କି ...?
ବସୁଧାକୁ ସାଥେ ନେଇ
କିଣି ଆଣିବ ଯେତେ ସବୁ ସତ୍ଯ, ନ୍ଯାୟ,
ଅହିଂସା ଓ ଶାନ୍ତିକୁ ,
ଆଉ ବଦଳ କରି ଦେବ ଯେତେ ସବୁ ,
ବସୁଧାକୁ ତା ସନ୍ତାନ ଦେଇଥିବା
ରାଗ, ଦ୍ବେଷ , ଅହଂ ଭାବକୁ
ହୁଏ ତ ଚାନ୍ଦ ନଗରୀ ପରି
ବସୁଧା ବି ଆଲୋକିତ ହେବ ତା ଚାନ୍ଦିନୀରେ ,
ଗୁଞ୍ଜରିତ ହେବ ମଧୁର ସୁର
ଯେବେ ବସୁଧା ବକ୍ଷେ ହେବ
ତାରକାଙ୍କ ପ୍ରବଳ ଗହଳି ।
ଝାପସା ପାହାଡ ସେପାରିରେ ,
ଚାନ୍ଦ ନଗରୀର ବଜାର,...... ଯିବା କି ?
ପ୍ରଶ୍ନ ଆସେ ମନେ ,......ବାର ବାର......ଲଗାତାର ।