ଅଭିନୟ

॥ ଅଭିନୟ ॥

ଗଛରେ ଫୁଟିଲା ଗୋଲାପ ଦେଖିଲେ

ଆଖିରେ କାମନା ଜଳୁଛି

ଡେମ୍ଫରୁ ଛିଡାଇ ପାଖୁଡା ସହିତେ

ଦଳିବାକୁ ମନ ଚାହୁଁଛି

ତଳେ ପଡିଥିବା ଫୁଲକୁ କିଏ ବା

ଛାତିରେ ଉଠେଇ ନେଉଛି

ଆହା ପଦକରେ ଜୀବନର ସାହା ହେଉଛି !

ମଞ୍ଜ ପତରରୁ ବାଛି ବାଛି ଯିଏ

ଯଉବନ ଚାଖି ଚାଲିଛି

ବାସି ହେଲା ପରେ ଚିରା ପତରକୁ

କୁଆଡେ କେଜାଣି ଫିଙ୍ଗୁଛି

ସିଏ କେବେ କାହା ଖାଲି ପତରରେ

ଅନୁରାଗେ ଫୁଟା ବଗଡା ଚାଉଳ

ଅନ୍ନ ମୁଠିଏ ବାଢିଛି !

ଅନ୍ଧାରକୁ ଯିଏ ଅଣ୍ଟିରେ ପୂରେଇ

ଦିନ ଆଲୁଅରେ ମିଛ ଅଭିନୟ କରେ

ପର ଦୁଃଖରେ ତା' ଆଖିରୁ କି କେବେ

ଦରଦ ଉଛୁଳା ଲୁହର ଝରଣା ଝରେ !