ପ୍ରକୃତ ପ୍ରେମ

ପ୍ରେମ ପରିଭାଷା ଅତି ଯେ ବିଚିତ୍ର

ସଂସାରଟା ଏହି ପ୍ରେମରେ ଜଡିତ

ପ୍ରେମ ବିନା ଲାଗେ ସବୁ କିଛି ତୁଚ୍ଛ

ପ୍ରେମ ଦ୍ୱାରାହିଁ ସଂସାର ଗଠିତ ll

ସଂସାର ମଧ୍ୟରେ ଶ୍ରେଷ୍ଠ ହିଁ ସମ୍ପର୍କ

ସମ୍ପର୍କରେ ଗଢ଼ା ସୁନ୍ଦର ବିଶ୍ୱ

ବିଶ୍ୱ ମଧ୍ୟରେ ପ୍ରେମ ଅଟେ ଶ୍ରେଷ୍ଠ

ପ୍ରେମ କରେ ନାହିଁ ସମ୍ପର୍କକୁ ଧ୍ୱଂସ ll

ପ୍ରେମରେ ନଥାଏ ରାଗ ହିଂସା ଘୃଣା

ସତରେ ବଡ଼ ନିଆରା

ଭକ୍ତି, ସ୍ନେହ ଆଉ ଶ୍ରଦ୍ଧାର ସମ୍ପର୍କ

ସ୍ୱର୍ଗ ସମ ଲାଗେ ଧରା ll

ପ୍ରେମରେ ନଥାଏ ମିଥ୍ୟା ପ୍ରତାରଣା

ଲୁଣ୍ଠନ ଧର୍ଷଣ କଷଣ ଯାତନା

ଆତ୍ମା ମନର ମିଳନ ଯେ ହୁଏ

ନଥାଏ ପ୍ରେମରେ ବାହାନା ଛଳନା ll

ନଥାଏ ବନ୍ଧନ ନଥାଏ ଆକଟ

ସୂତାଖିଅ ଟିରେ ଛନ୍ଦା

ସେ ସୂତାଖିଅଟି ଅତି ଯେ କୋମଳ

ଜୀବନ ପଡଇ ବନ୍ଧା ll

ପ୍ରେମହିଁ ଶାନ୍ତି ପ୍ରେମ ଅହିଁସା

ପ୍ରେମ ଆଣିଦିଏ ବିଶ୍ୱରେ ଏକତା

ପ୍ରେମରେ ନଥାଏ ଉଚ୍ଚ ନୀଚ୍ଚ ଭାବ

ପ୍ରେମରେ ଥାଏ ସତ୍ୟ ଶିବ ସୁନ୍ଦରତା ll

ଯୁଗେଯୁଗେ ପ୍ରେମ ଅଜୟ ଅମର

ପ୍ରେମ ପାଇଁ ପରା ଦୁନିଆ ପାଗଳ

ପ୍ରେମ ଅମାନିଆ ସମୁଦ୍ର ଜୁଆର

ହଜି ଯାଆନ୍ତି ପ୍ରେମୀ ଯୁଗଳ ll

ସେ ଜୁଆରକୁ ଯେ କରେ ଅକ୍ତିଆର

ଘର ହୋଇଯାଏ ସ୍ୱର୍ଗ ଠୁଁ ସୁନ୍ଦର

ଶାନ୍ତି ମୈତ୍ରୀ ପ୍ରୀତି ସଦା ରହେ ସେଠି

ଦୁନିଆକୁ ସେ କରେ ଆଦର ll

ସୁକାନ୍ତି ହୋତା

ତାଳଚେର