ମମତାର ରୂପରେଖ
ମମତାର ରୂପରେଖ
ପରସ୍ପର ପ୍ରତି ସଦ୍ଭାବ ନଥିଲେ
କରମ ଲାଗଇ ପୋଡା
ପରିବାର ମଧ୍ୟେ ସୁଖଶିରୀ ପାଇଁ
ଅପୂର୍ବ ବନ୍ଧନ ଲୋଡା ।
ଶିକ୍ଷା ଦୀକ୍ଷା ସହ ଆଦର ସମ୍ମାନ
ପରିଜନ ହୃଦେ ଥିଲେ
ଘାତ ପ୍ରତିଘାତେ ଏକତାର ସାଥେ
ସୁଖଦ ଜୀବନ ମିଳେ ।
ସଭ୍ୟ ଜଗତରେ ମଣିଷ ହୋଇ ବି
ସୁଖେ ମାତି ଦୁଇବେଳା
ଶିଶୁଙ୍କ ବିକାଶେ ଅଜାଣତେ ପଛେ
କରିଥାଉ ଅବହେଳା ।
ହାତୀ ଭଳି ଏକ ଜଙ୍ଗଲୀ ପଶୁର
ଜୀବନ ଶଇଳୀ ଦେଖ
ସାମୁହିକ ସୁଖେ ପରସ୍ପର ହିତେ
ମମତାର ରୂପରେଖ ।
ଶିଶୁର ଯତନେ ମାତାପିତା ଅବା
ପ୍ରତ୍ୟେକ ବୟସ୍କ ହାତୀ
ତୀକ୍ଷ୍ଣ ଦୃଷ୍ଟି ରଖି ସତର୍କ ଥାଆନ୍ତି
ଦିନ ହେଉ ଅବା ରାତି ।
ବୟସ୍କା ମାଆ ହିଁ ମୁଖିଆ ଭାବରେ
ହିତାହିତ ରଖେ ଜାଣି
ଦଳ ମଧ୍ୟେ ରହି ସମସ୍ତେ ଚଳନ୍ତି
ତାହାର ନିର୍ଦ୍ଦେଶ ମାନି ।
ନବଜାତ ଶିଶୁ ଲାଳନପାଳନେ
ବିପଦ ସଙ୍କେତ ଲକ୍ଷି
ଖାଦ୍ୟ ଅନ୍ବେଷନ୍ତି ଗମନାଗମନେ
ଶୃଙ୍ଖଳା ନିୟମେ ରଖି ।
ନିର୍ବାକ ପଶୁର ଭଲଗୁଣ ଯେତେ
ଶିଖେନି ମଣିଷ ମୂଢ
ଶୃଙ୍ଖଳିତ ପ୍ରତି ପରିବାର ଦ୍ଵାରା
ସମାଜ ହୁଅନ୍ତା ଦୃଢ ।