ଆତ୍ମାପକ୍ଷୀ ଉଡିଯିବ
ଆତ୍ମାପକ୍ଷୀ ଉଡିଯିବ
ଗାଁ ମଶାଣିରେ ମୋଶବ ଜାଳିବ
ନେବନାହିଁ ସ୍ୱର୍ଗଦ୍ୱାର
ଗାଁ ଭାଇଙ୍କର ସେନେହ,ଆଦର
ମୋପାଇଁ ସରଗପୁର ॥
ଗାଁ ଶେଷମୁଣ୍ଡେ ବରଗଛ ଲାଗେ
ସତେକି କଳପବଟ
ନରେନ୍ଦ୍ରପୋଖରୀ ତୁଠଠାରୁ ବଳି
ମୋଗାଁ ପୋଖରୀ ତୁଠ ॥
କୋଇଲିର ଗୀତ ଗୀତା,ଭାଗବତ
ମୋଘର ଶିରୀମନ୍ଦିର
ମାଆର ପଣତ ଶ୍ରୀମନ୍ଦିର ନେତ
ପତିତ ହୁଏ ଉଦ୍ଧାର ॥
ଗାଁଦାଣ୍ଡଧୂଳି ବଡଦାଣ୍ଡ ଧୂଳି
ମଥାରେ ଦେଇଛି ବୋଳି
ଭଲରେ ମନ୍ଦରେ ସାହାଭରଷା ମୋ
ଜନ୍ମମାଟି ପାଦଧୂଳି ॥
ଗାଁରେ ଆରମ୍ଭ ଜୀବନ ନାଟକ
ଗାଁରେ ହୋଇବ ଶେଷ
ଶେଷବେଳେ ଦେବ ନିର୍ମାଲ୍ୟ କଣିକା
ଆମ୍ବବଉଳର ବାସ ॥
ଏ ମାଟି କୋଳରେ ବଢିଥିଲି ଦିନେ
ଏ ମାଟି କୋଳେଇ ନେବ
ତେବେ ମନୋରଥ ପୂରଣ ହୋଇବ
ଆତ୍ମାପକ୍ଷୀ ଉଡିଯିବ ॥
ଶରତ ଚନ୍ଦ୍ର ଜାଲି
ତା:୨୬/୭/୦୧୮