ତୁମର କି ମନେଅଛି?
ତୁମର କି ମନେଅଛି?
ମୋର ତ ମନେ ନାହିଁ,
ଗଲା ଜନ୍ମରେ
କ’ଣ ହେଲା ବା ନହେଲା,
ତୁମର ଯଦି ମନେଅଛି, କହିବକି
ଆମର ମିଳନ ହେଲା ନା’
କେଦାର ଗୌରୀଙ୍କ ପରି ବିଚ୍ଛେଦ ?
ମୋର ତ କିଛି ମନେନାହିଁ
ଯଦି ତୁମର ମନେପଡେ
ସବୁ କଥା ଖୋଲି କହିବ କି ?
ମୋତେ ଲାଗେ, ବୋଧହୁଏ
ଆମେ ହୀର ରାଞ୍ଝା ଅବା
ଲୈଲା ମଜନୁ ହିଁ ଥିଲେ ।
ଆମେ ଯଦି ମିଳି ଥାଆନ୍ତେ ଥରେ,
ହୁଏତ ମନ ଭରିଯାଇ ଥାଆନ୍ତା,
ଗୋଟିଏ ଜନ୍ମର ପ୍ରେମରେ,
ଆଉ ଆଜି ତୁମକୁ ଦେଖି
ଏପରି ବା କାହିଁକି ଲାଗନ୍ତା ?
ଆମେ ପ୍ରେମୀ ଥିଲେ
କି’ ନଥିଲେ ଜାଣେନା,
କିନ୍ତୁ ଏମିତି କାହିଁକି ଲାଗେ,
ମୁଁ ତୁମକୁ ଚିହ୍ନିଛି
କେତେ ଯେ ବରଷ ଆଗରୁ ।
ବରଷ ନୁହେଁ ଗୋ,
ଜାଣିଛି ତୁମକୁ ସତେ,
ସାତ ଜନମରୁ ।
ତୁମେ କିବା ବିଶ୍ୱାସ କର
ଜନ୍ମ ଜନ୍ମାନ୍ତର କଥା ?
ମୁଁ ତ କରେନି, ହେଲେ
ତୁମକୁ ଦେଖିଲା ପରଠୁ,
ଜନ୍ମ ଜନ୍ମାନ୍ତର କଥାରେ
ବିଶ୍ୱାସ କରିବାକୁ ମନହୁଏ ।
ମୋର ତ କିଛି ମନେନାହିଁ,
ଯଦି ତୁମ ମନେଅଛି,
ସବୁ କିଛି ଖୋଲି କହିଦିଅ !
ତୁମକୁ ଦେଖିଲା ପରଠୁ
ଯେମିତିି ଲାଗୁଛି ମୋତେ
ତୁମକୁ କି ଲାଗୁଛି ସେମିତି ?
ଟିକିନିଖି ମନକଥା ତୁମ,
ଖୋଲି କହି ଦିଅ ସତେ ।
ପ୍ରେମ କେବେ ଲୁଚି ତ ପାରେନା,
ବନ୍ଦ ହୃଦୟର ସିନ୍ଦୁକ ଭିତରେ,
ତୁମ ମନକଥା, ତୁମ ଆଖି ଖୋଲି କହିଦିଏ,
ହେଲେ, ତଥାପି କାହିଁକି ତୁମେ
ମୋ ଠାରୁ ଏଇମିତି, ରୁହ ଦୂରେ ଦୂରେ !
***$***